Balkon3

Category: Настани

  • Кој е грчкиот остров што нема змии?

    Точниот одговор  – а тоа е Анафи (an-ofis, т.е. без змии) – му беше пратен по твитер на Паоло Несполи, италијански астронаут од Европската вселенска агенција кој се наоѓа на мисија на Меѓународната вселенска станица. Неговата фотографија од малечкиот остров Анафи во групата Цикладски острови (Cyclades) во Егејското море, е една од многуте на кои е фотографирана нашата сина планета.

    Островот Анафи фотографиран од вселената

    Несполи на интернет сподели стотици фотографии од Земјата што тој ги направи од вселената и доби многу ентузијастички одговори од целиот свет на секое постирање во текот на сите 159 дена колку што живееше на вселенската станица, на која работеше на техничко одржување.

    Многу од неговите фотографии можат да се видат изложени во Фондацијата Еугенидес, грчки водечки институт за технологија и вселенска наука. Влезот за изложбата со наслов „Пат во вселената, низ фотографии на Европската вселенска агенција (ESA)“, е бесплатен (работни денови од 11ч до 20:30ч, резервации на +30210 9469688) и ќе трае до четврток, 12-ти април. Изложбата беше отворена од самиот Несполи на крајот на март, а во интервјуто пред отворањето за весникот Катимерини, 54 годишниот астронаут од Милано рече: „Кога сме на земјата со око може да ги видиме само ѕвездите, но кога сето ова го гледате од горе, сфаќате дека сите ние сме поблиску едни со други отколку што мислиме дека сме. “

    Паоло Несполи

    Оние кои планираат да ја посетат изложбата на Фондацијата Еугенидес и незјините активности, треба исто така да го посетат и новиот Планетариум на институтот, најголем во цела Европа (www.eugenfound.edu.gr) и да присуствуваат на една од прекрасните презентации за Земјата и Универзумот. После се, гледано од окото на Насполи, Земјата сепак изгледа како убав син брод кој плови по вселената.

    Софија Николау

  • Десетдневна модна пролет во Скопје

    Петтата сезона на Модниот викенд – Скопје пролет/лето 2012 која почна на втори април и ќе трае десет дена со својата богата програма веќе ги крена на нозе љубителите на модата. Деновиве градот пулсира во ритамот на најновите модни случувања и свежи колекции, а главните настани се одржуваат на неколку локации.

    Серијата модни ревии, коктели, забави, изложби, хуманитарни проекти и ексклузивни настани започна во понеделникот кога се случи свеченото отворање со прогласувањето на победникот во отворениот конкурс на „Пелистерка“ за нов дизајн на шише – Јована Филиповиќ. По ова следуваа изложбите на фотографии „Природа и мода“ на фотографското дуо Ани и Дими односно АД Фотографи, Билјана Ќосева и Жарко Чулиќ изложени во новоотвoрениот „шоурум“ со дизајни на облека и накит од македонски креатори.

    Димитар Петровски, кој заедно со својата партнерка Андријана Костова се официјални фотографи на Модниот викенд вели:

    – Од почетокот на Модната Недела сме главни фотографи задолжени за покривање на целиот настан, но и за изработка на фотографии за рекламите и за каталозите. Драго ми е што во овие пет изданија на модната недела, заедно со квалитетот на самиот настан, напредувавме и ние, и го развивавме нашиот фотографски израз. Изложбата на ова издание на Fаshion weekенд е инспирирана од темата за оваа пролет/лето сезона, па во таа насока учествувавме со неколку фотографии направени во природа. Дел од нив се постари, а дел првпат беа презентирани на оваа изложба.

    Ветеранот на македонската мода, Никола Ефтимов во свој уникатен стил ја претстави својата нова модна приказна од Ориентот наречена „Хонг Конг експрес“ која ја создаде во соработка со својата асистентка Александра Јовановска. Како продолжение на неговата претходна колекција од минатиот моден викенд, која повеќе беше фокусирана на уличната мода, овој пат Ефтимов даде свој осврт на тоа како да се изгледа фанки, ексцентрично и модерно за вечерните излегувања со низа колоритни креации во живи бои, необични материјали и иновативни кроеви.

    – Новата колекција (Hong Kong Express) е инспирирана од филмовите на Вонг Кар-Ваи, особено од “In the mood for love” и “2046”. Создадов 16 модни изгледи: 11 женски и 5 машки. За изработката е употребена мешавина од традиционални и природни материјали. Најголем дел од женските изгледи се стилизирани од чипау-фустани, а машките модели се стилизација на класичниот костим со елементи на спортска облека. Дизајните за ревијата во Американската амбасада се дел од серијата направена за оваа пригода. Ја нареков “The Bebop Baroness”. Инспирацијата беше животот на една британска бароница (Baroness Pannonica de Koenigswarter). Таа (Pannonica) е можеби најголемиот покровител на бебоп музичарите, особено Телониус Монк, изјави Ефтимов.

    Во вторникот, Американската амбасада во Македонија ги отвори вратите за настанот „Џезот и модата“, а домаќинот – американскиот амбасадор Пол Волерс уште еднаш докажа дека планира да биде патрон на вакви и слични случувања, кои ќе ја промовираат македонската модна индустрија.

    Тринаесет дизајнери ги претставија своите уникатни креации што беа специјално креирани за оваа пригода која беше омаж на џез ерата од 1920-тите. Црната елеганција доминираше на модната писта, но секако не беа запоставени ни креациите во кои имаше појаки бои. Меѓу учесниците во оваа вечер, во која се славеше џез музиката и елегантниот стил на облекувања, беше и младата креаторка Ведрана Панева, кој изјави:

    – Jazz& fashion беше одлична соработка помеѓу Американската амбасада и дизајнерите и можеше да се види како сите различно размислуваме на една иста заедничка тема, да се запознаеме и да размениме искуства. Одлична организација и прекрасни домаќини. Мислам дека вакви соработки треба почесто да се случуваат, а зошто да не стане и традиција секоја година да има тематски ревии. Јас се претставив со два модела инспирирани од филмот „Gatsby“, и музиката од тоа време пренасочена во модерен стил.

    Во средата во Музејот на ВМРО и жртвите на комунистичкиот режим се одржа гала ревија во чест на петгодишниот јубилеј на дизајнерското дуо Тања Кокев и Мила Кадриу. Нивната нова колекција всушност беше осврт на сето она што го создаваа во изминатите години, односно избор на 30 модели на венчаници и коктел-фустани од свила.

    Истанбулска модна недела

    Истанбулската модна недела е платформа која беше создадена за да се поддржи работата на турските дизајнери и брендови во национални и интернационални рамки. Целта е да се поттикне дизајнерската сила и потенцијал на модната индустрија и да се поддржи економскиот раст на секторот. На неа дизајнерите и познатите брендови веќе неколку години наназад ги претставуваат своите колекции, а идејата е да се формира мост со кој талентираните креативци од Турција и соседните земји ќе го прошират своето поле на дејствување во светски рамки. Петтата по ред модна недела на која настапија 22 дизајнери и пет брендови се одржа лани од 7 до10 септември во Истанбул. Со четиридневниот настан, Истанбулската модна недела за пролет/лето 2012 го стави градот на светската модна мапа, а ја посетија 30 000 гости и 250 странски медиуми.

    Атинска модна недела

    Привлекувајќи илјадници посетители, странски новинари и селебрити фаци, Атинската модна недела полека го освои своето место во модниот свет. Грчките и интернационалните дизајнери се обединуваат за оваа екстраваганца што се одржува во Технополис. Оваа година по петнаесетти пат овој традиционален моден настан ќе се случува во периодот од 17-21 април, а покрај ревиите ќе има и бројни културни случувања, концерти, изложби, наградни конкурси и работилници. Во рамките на Атинската модна недела, до сега се имаат претставено дизајнери како Софија Кокосалаки, Жан Шарл де Кастелбажак, Гаспард Јуркијевич.

    Елена Петковска

    фото: АД Фотографи

  • Истанбул домаќин на завршниот Евролига кошаркарски турнир

    Панатинаикос, ЦСКА Москва, Олимпијакос и Барселона се четирите екипи учесници на завршниот турнир во кошаркарската Евролига. Домаќин на турнирот е градот Истанбул, каде од 11 до 13 мај ќе се води жестока битка за освојување на престижната титула, најдобар европски кошаркарски колектив. Панатинаикос во полуфиналето за противник ќе ги има ЦСКА Москва. Тимот пак, на нашиот капитен, Перо Антиќ, Олимпијакос во полуфинале ќе ги одмери силите со Барселона. Сите натпревари ќе се играат во салата Синан Ердем, која има капацитет од 16 илјади гледачи. Ова е најголемата сала во Турција именувана по Претседателот на Националниот олимписки комитет на Турција, кој оваа функција ја извршувал од 1989, па се до неговата смрт во 2003 година.

    Ако одлучите да присуствувате на овој спектакл, наш совет е да побрзате со купувањето на билети, бидејќи достапни остануваат се помалку места. Цените на билетите за сите натпревари, освен за финалето се движат од 399 евра, па се до 899 евра колку ќе треба да платите ако сакате да бидете во ВИП ложите. Одлична прилика да поминете возбудлив викенд во Истанбул каде освен што ќе имате прилика да гледате одлична кошарка, ќе уживате во убавинита на импресивниот бисер на Босфорот.

  • Брисел се подготвува за тродневниот Балкан Трафик фестивал

    Бриселската Палата на убави уметности е по шести пат годинава домаќин на фестивалот Балкан Трафик (Balkan Trafik). Годинава, повеќе од кога и да е, Балкан Трафик ви ја претставува автентичноста на балканската култура. Во уникатна атмосфера повеќе од 200 уметници ве очекуваат да ги споделат со вас нивната музика, филм, танц, ателјеа, гастрономија…. Празник за очи и уши и ритмови на кои не може да им се одолее кој се одржува од четврток 12 до недела 15 април 2012 година.
    Балкан Трафик е место на кое секоја година се среќаваат најдобрите уметници од регионот и од дијаспората, секој со сопствен стил. Фестивалот нуди примероци од различните култури и заедници од југо-источна Европа и привлекува секоја година над 7500 посетители.
    Палата на убави уметности Брисел
    12-15 април 2012
    Сајт на Фестивалот
    www.1001valises.com

  • Солун и Атина го слават јубилејот 200 години Дикенс

    Ако патувате во Солун или Атина ви препорачуваме неколку интересни настани кои се организираат како дел од глобалната Дикенс 2012 програма за одблежување на големиот јубилеј, 200 години од раѓањето на писателот Чарлс Дикенс. Во овие два града од 29 март до 7 април ќе се одржат повеќе работилници, дискусии и филмски проекции посветени на овој автор. Одлична прилика за книжевниците, но и за сите останати љубители на пишаниот збор да поминат неколку возбудливи денови. Настанот е во организација на Британскиот совет во Грција, на чија официјална страница можете да најдете повеќе информации околу пријавувањето и самата програма

  • Финале со “Ankara wind quintet”

    Годинашните Денови на македонската музика завршуваат вечерва со два концерта. Во Музејот на Град Скопје во 20 часот ќе настапи составот „Ankara wind quintet“ од Турција, а од 21 часот ќе се одржи настапот на Мехмет Џан Озер, Мирослав Спасов и членовите на турскиот квинтет ќе одржат концерт на електронска музика.

    Ankara Wind Quintet

    “Ankara wind quintet” е формиран во 2006 година под раководство на Џем Онертурк и Анд Карабаџак, се состои од музичари кои се образовани во Германија и Англија. Целта на дувачкиот квинтет од Анкара била да се поддржи современата музика во Турција. Од основањето се до денес квинтетот има оддржано бројни премиерни изведби на дела од современи турски композитори.

  • Во Њујорк презентација на новиот албум на Бојаџиев

    Васко Дуковски, нашиот веќе добро познат кларинетист, кој живее и твори во САД, денеска настапува во клубот „Дром“ во Њујорк,  каде што заедно со прекрасен тим изведувачи ќе го придружуваат македонскиот композитор, продуцент и пијанист Дуке Бојаџиев. Ќе биде презентиран материјалот од новиот албум на Бојаџиев „Сон. Верба. Љубов.“, кој се очекува да излезе наскоро.

    Дуке Бојаџиев

    Пред неколку дена на 21 март настапи и во Обединетите Нации по повод дебатата за меѓуетнички и меѓучовечки односи на Алијансата за цивилизации на ОН, организирана од претседателот на ОН, на кој изведе дела од познатиот српски композитор Александар Симиќ. Минатиот викенд со ансамблот за современа музика Арџенто имаше усшпешен настап изведувајќи седум премиери на дела компонирани од композитори од Универзитетот Колумбија (Columbia University).

    Васко Дуковски

    Новиот албум кој го работи заедно со ансамблот за современа музика Талеа, содржи дела од познатиот италијански композитор Фаусто Ромители (Fausto Romitelli) и ќе биде снимен наредниот викенд во мултимедијалниот културен центар “EMPAC” кој го поттикнува развојот на авангардни уметници и композитори.

  • Премиера на Скопје ремикс

    Македонската публика на 30 март премиерно ќе може да го види долгонајавуваниот музичко-филмски омнибус Скопје Ремикс. Проектот составен од девет кратки филмови на кој работеa дел од најавангардните млади режисери, меѓу кои Борјан Зафировски, Даријан Пејовски, Ѓорче Ставрески, Срѓан Јаниќијевиќ, Огнен Димитровски , Саша Станишиќ,Вардан Тозија, Синиша Ефтимов и Бојан Трифуновски .

    Според авторите, главна движечка сила на овој филм е неуништливиот дух на Скопје. Иако Скопје нема свои суперхерои какви што имаат Готам Сити -Бетмен и Метрополис -Супермен, сите негови граѓани се своевидни суперхерои. Наспроти сите економски и други ограничувања со кои се соочени послениве 15 години, тие секогаш успеваат да изнајдат начин да се забавуваат, да се вљубуваат, да искусат малку радост и среќа и да ја изиграат тмурната реалност што постојано им ја наметнуваат светските збиднувања.

    Од денес на страница на ПМГ рекордингс  за бесплатно симнување е достапен и официјалниот саундтрак работен од поголем број на бендови и музичари.

  • Балкански инвеститорски форум

    Иноватори и инвеститори од регионот, но и од западна Европа, Турција и Израел, ќе допатуваат на регионалната конференција во Скопје што ќе се одржи на 18 и 19 Април. На едно место ќе се соберат најдобрите иноватори од Балканот, голем број инвеститори од регионот, политичари што донесуваат одлуки во оваа област, големи и мали компании, академски истражувачи. Центар на сите случување ќе биде Метрополис Арената. Настанот е во организација на Фондацијата за развој на иновациите и претприемништвото на Балканот, под покровителство на председателот Ѓорѓи Иванов.  Одлична прилика да го пријавите вашето учество и да дознаете кои се најновите инвеститроски трендови и да споделите дел од вашето знање. Картите можат да се купат онлајн на официјалниот сајт на организаторот. Таму ќе најдете и подетално инфо за сите учесници.

  • Bei The Fish во Солун предгрупа на dEUS

    Со својот препознатлив музички израз Bei The Fish докажа дека е еден од најавангардните бендови на Балканот. По неколкуте забележителни турнеи и настапи со реномирани групи и пејачи како Massive Attack, Amy Winehouse, Moby добија покана за настап со култниот белгиски состав dEUS. Свирката е закажана во клубот Mylos во Солун на 16 март.
    Доволно време да се организирате со вашата екипа во живо да проследите два навистина одлични бендови кои го заслужуваат вашето присуство.  Според најавите, Bei The fish во Солун ќе настапат во придружба на нивниот соработник, Англичанецот Ола Диос. Концертот на dEUS во Солун e во рамките на нивната европска турнеја на која го промовира својот последен албум. Билетите се продават по цена од 32 евра. Повеќе инфо може да добиете на овој линк.