Tag: балкан

Осум апсурди на балканскиот големодржавен национализам

(Иако ги има милиони, односно сето тоа е еден голем апсурд, но сепак…)

1. Секоја балканска држава смета дека треба да биде поголема од што е, до таа мера што би ни бил потребен барем уште еден Балкански полуостров за да се задоволат сите.

2. Но, никоја не смета дека треба да им земе нешто на другите, туку само дека треба да „си го врати своето“.

3. Сите држави имаат „историски аргументи“ дека треба да бидат поголеми, како стари мапи, камења од розети, пророштва и сведоштва, манастирски списи, и особено книги што се чуваат во западни музејски библиотеки „каде што вистината се крие за да не излезе на виделина“.

4. Сите, исто така, имаат замислен непријател – масони, илуминати, Ватикан, Билдерберг, англиската круна или некој друг, што со векови работи и крои заговори против нивното обединување, за да ги спречи да станат голема и силна држава што би го покорила Балканот, а потоа и светот.

5. Главната причина поради која сите овие држави се во тињата од секој аспект со кој се мери квалитетот на животот или животниот стандард, не се бара во тоа како ги водат нивните политичари, туку токму во „фактот“ дека не се обединети, зашто токму тој дел што им фали е клучен за да станат моќни и просперитетни. Секогаш тоа е најплодното поле, најбогатите планини, излезот на море, стратешките позиции, и особено светите места, кои би требало веројатно со некоја магична сила да направат државите да процветаат и да ги покорат другите, ама нивната сила со сите средства се чува затворена и не и` се дозволува да се ослободи

6. Но, од друга страна, „деловите што фалат“ не се ниту исчезнати, ниту потопени, ниту префрлени некаде на запад, туку повторно се под власт на некоја друга балканска држава, па колку и да се плодни, богати, стратешки или волшебни, ниту неа не успеале да ја извадат надвор од тињата.

7. Има една мала држава сред Европа, толку мала што одвај се гледа на карта, заглавена меѓу карпи и планини, завеана во снегови, одвај некоја нива да има, опколена со големи држави, оддалечена околу 200 километри од најблиското море, па според сите балкански географски „стандарди“ би требало да е пропадната, ама не е. Се вика Швајцарија.

8. Има и една друга држава што зафаќа речиси цел полуостров, а доминира и над тоа што не го контролира, владее и со земји што се нејзини и со територии што бараат да се отцепат од неа, но има широки плодни полиња, богати планини, две мориња, океан, стратешки не може да биде подобро позиционирана дури и да сака, а и со светињи е во суфицит, па сепак се дави ли се дави во новава европска тиња, и никако да излезе. Се вика Шпанија.

Гоце Трпковски

March 31, 2020
Ѓомлезе се прави со многу љубов, трпение и силен оган

Кој не пробал ѓомлезе, не знае што пропуштил. Постои некаква тајна магија што ова навидум едноставно јадење го прави посебно. Можеби е мачниот начин на кој се прави, можеби е љубовта што е неопходна како состојка во ова печиво.

Состојките не се ништо невообичаено – брашно, вода, сол, кисело млеко. Сите се согласуваат дека е една од најубавите работи што можете да ги пробате во Македонија, а охриѓани и преспанци на големо расправаат чие ѓомлезе е најубаво. Традицијата вели дека токму во овие делови на Западна Македонија најмногу се задржала навиката на правење ѓомлезе, која најверојатно е уште една од придобивките на турската култура во земјава.

„Балкон3“ беше гостин на семејно правење ѓомлезе во питомото село Коњско, во Преспа. Домаќинката Џени Ѓоргиевска заедно со своите помошници, не упати во тајните на правењето ѓомлезе. Тоа утро, таа заедно со својот сопруг Нане, кои живеат во Ресен, уште во 6 наутро веќе ја правеа кашата од која се прави ѓомлезето.

-Нема стандардна мерка. Се се сведува на вкус.

Во Преспа, освен брашно, вода, сол, ставаме и кисело млеко. Во некои краеви, додаваат и јајца во смесата. За една поголема тепсија, јас употребив 2.5 кг брашно, вода ставив по потерба, околу осум лажици сол и едно канче к.млеко. Јас сакам корите да се потенки, затоа ја правам и смесата потечна. Печеме во бакарна и во алуминиумска тава – вели Ѓоргиевска.

Се пали силен оган и на него се грее сачот (вршникот). Тавите се мачкаат со масло за јадење, па почнува редењето на корите. На секоја кора се пропрскува со зејтинот по малку и се пече под сачот. Многу е важно оганот да се одржува силен. Од тоа, меѓу другото, зависи колку време ќе биде потребно за да се направи вкусното јадење. Тоа утро, нашата домаќинка подотви мастраф за две големи тави, оти имаше многу гладни и нестрпливи усти. Во Ресен се вели, ако една жена не знае да направи ѓомлезе, исто како да не е домаќинка.

Некогаш ѓомлезето најчесто се правело само во посебни прилики, за важни гости.

-Ако некому си му отишол на гости и тој ти направил ѓомлезе, значи дека многу те почитува. По ѓомлезето, второ такво специјално јадење е капама со ориз и со риба. На времето зборуваат политичарот Благоја Попов дошол во Коњско и што ѓомлезиња му направиле, па капама, со години се раскажувала таа анегдота – раскажува Роза Велкова, родена во Коњско, денес кочанчанка.

Таа е категорична дека меѓу корите не треба ништо да се додава. Ако ставете сирење меѓу корите, тогаш правите нешто друго – вели тетка Роза.

Откако ќе се потроши и последната лажица, време е за корите да се потпечат и ѓомлезето побрзо да се најде на масата. Малце се потпечува последната кора и над неа се става сачот, а под тавата – жар. Многу е важно над сачот да се стави пепел, која помага за да се одржува топлината. Пред да се пече, ѓомлезето се сече на ромбови (баклавички) и се става да поврие малку.

-Што правиме ако не ми го бендисаат – се шегува нашата домаќинка.

Со еден сач и две тепсии, на нашите домаќини им требаа шест часа за да биде целосно готово. Јадењето се комбинира со сирење, јогурт, патлиџан, матеница, секој по свој вкус.

Никој не знае да каже од кога датира ѓомлезето, важно е дека традицијата се пренесува од колено на колено. Но, интересно е што традицијата на правење ѓомлезе во Преспа се повеќе се враќа.

-Во Ресен во последно време многу се прави. Матурски, веридби, веселби не можат да поминат без ѓомлезе или питулици и аршлами (варено тесто кое се пече со ситна тарана, н.з.) Бара трпение, кондиција и нормално, помош. Некој да го одржува оганот и да помага со сачовите, а некој цело време да става од мастравот – велат Ѓоргиевци.

Преспанскиот регион има посебен пиетет кон месените работи.

-Ѓомлезето ме прави носталгичен и ме потсеќа на утрата што мирисаа на него кога баба ми го правеше. Тој мирис ми е навлезен во душата, можеби и поради тоа што ретко се прави, а богами и тешко – вели страствен вљубеник во неговото височество – ѓомлезето.

Така, дури од тепсијата не се отстрани и последното парче ѓомлезе и тоа најчесто со гребење со вилушка, нема напуштање на масата. Иако ѓомлезето се консумира и подоладено, ретко кога се остава за подоцна.

Доколку сакате ова јадење да го подготвите дома потребни ви се следниве состојки:

450 гр брашно

околу 320 мл топла вода

7 гр сув квасец

1 лажиче шеќер

2 лажички сол

масло за премачкување

за фил:

300 гр спанаќ, обарен

100 гр фета сирење

1 мало чешне лук, ситно сечкано

1 лажица путер

Подготовка:

Во брашното ставете ја солта и просејте ги низ ситно (цедалка) во длабок сад. Во топлата вода ставете ги сувиот квасец и шеќерот да се растопат. Кога квасецот ќе се запени, ставете го во садот со брашното. Замесете меко тесто и оставете го на топло да ја удвои големината.

Кога ќе забележите дека тестото се удвоило, поделете го на 8 еднакви топчиња и нив оставете ги да нараснат малку.

За тоа време, подгответе го филот. Спанаќот обарете го. Обарениот спанаќ исечкајте го на ситни парчиња. Лукчето ситно сечкајте го и ставете го тавче за пржење со малку масло да се запржи. Кога ќе фати боја, ставете го претходно убаво исцедениот и исечкан спанаќ. Сирењето згмечете го со вилушка и ставете го во спанаќот. Целиот фил убаво измешајте го. Зачинете со сол и бибер по вкус. Секое топче со сукало развлечете го што потенко можете.

Филувајте на едната половина го со фил нанесен во тенок слој.

Преклопете и стиснете ги краевите. Вака подготвени, печете ги во тавче (најдобро да биде керамичко) малку намачкано со путер/маргарин/масло. Печете 3 до 4 минути на средна темепратура, притоа внимавајќи да не изгори.

Овој специјалитет во Турција можете да го најдете скоро во секој ресторан, но јас Ви препорачувам да седнете токму во оние ресторани каде што ќе можете видите како жените на лице место Ви го подготвуваат. Со ова јадење може да се напиете и ладен Ајран.

Се уште е енигма од каде точно потекнува ѓомлезето. Називот влече корени од турскиот збор gözleme (“göz al-melek”) што би значело ангелски очи. Се вреува дека ѓомлезето се правело во охридскиот и во преспанскиот регион многу пред доаѓањето на османлиите на Балканот. Популарно се нарекува и тури-потпечи. Од турскиот јазик го има само називот.

Пријатно јадење со рецептот на Балкон3:)

Сребра Ѓоргиевска/Кристина Ангелеска

October 8, 2014
Добри вицови од Балканот

1.

Германец, Французин, Англичанец и Грк коментираат за сликата на Адам и Ева во Еденската градина.

Германецот вели “Погледнете ги овие совршени тела, таа е висока и русокоса, тој е атлетски граден и мускулест… сигурно се Германци.”

Французинот веднаш реагира “Не верувам дека се Германци. Чиста еротика извира од двајцата. Таа е толку женствена, а тој мажестван… Знаат дека наскоро ќе се соочат со искушението… сигурно се Французи.”

Англичанецот се спротивставува “Погледнете. Смирениот израз на нивните лица, суптилното држење на нивните тела, чувствителните движења. Може да бидат единствено Англичани.”

И Гркот извикува “Не се согласувам! Овие луѓе се дефинитивно Грци! Погледнете внимателно: Адам нема панталони. И двајцата се боси. Спијат под дрво. Имаат само едно јаболко за јадење. Не протестираат за тоа. И одозгора на сè, веруваат дека живеат во рајот!”

2.

Слонот го прашува диносаурусот “Ти прати ли Ное покана за пријател?”

“Не”

“Тоа е лоша вест…”

3.

Мажот ја прашува жената: Што има за ручек, ми се јаде.

Жената: Ништо нема.

Мажот: И вчера ништо денеска пак ништо..

Жената: Е, јас кога готвам готвам за два дена да има..

4.

Неколку брачни парови кои подолго време се во брак, на заедничка седенка почнуваат муабет за тоа колку се караат со нивните сопруги, сопрузи.. и во тааа дискусија се вртат кон еден од присутните и му велат. Добро бе, ние се караме сите, лом се правиме, тебе и женати не сме ве виделе никогаш да се скарате, да кренете глас. Како ви успева тоа?

Е, како.. Убаво, ние се имаме договорено уште кога се земавме некои основни работи и се придржуваме до нив и така..

Е што се договоривте, прашуваат присутните.

Па, се договоривме за сите покрупни и битни работи одлучувам јас, а за сите поситни и не толку битни работи одлучува жена ми.

И?

Па до сега ништо крупно и битно немало..

5.

Зошто Македонците не одат подалеку од Халкидики на одмор?

За да не им се расипат патлиџаните и сирењето.

May 18, 2014
10 лица на Скопје – како 10 различни страни на светот

Секој поголем град има многу лица. Некои делови од него изгледааат како да се во друг град, во друга држава, дури и на друг континент.

Светските урбанисти сметаат дека градовите во последниве 50 години се` повеќе стануваат глобални, наместо национални, вклучувајќи во себе многу различни карактеристики што го отсликуваат нивниот мултикултурен карактер.

Кога на тоа ќе се додаде долгата и сложена историја на Скопје, кое што сите освојувачи го менувале како што го заземале, а големите катастрофи им ги „поправале“ грешките или во поново време отворале можности за експериментирање, шареноликоста е апсолутно загарантирана.

Еве кои се` делови од светот Балкон3 ги препознава во главниот град на Македонија.

ОРИЕНТОТ

Ова е Старата скопска чаршија, позната и како турска чаршија. Најстариот жив дел од градот, полн со трговци, занаетчии (најмногу златари), ресторани, чајџилници, кафулиња, се` до апсинт-барови како од егзотичните патувања на Шерлок Холмс. Срцето на Скопје, според сите критериуми, во кое е длабоко врежан ориенталниот дух.

ИСТОЧНА ЕВРОПА

Широките улици со еднолични, главно сиви стамбени блокови изградени покрај нив, се карактеристични за многу источноевропски метрополи. Скопје е, сепак, во тој дел од светот и многу негови делови се уредени на тој начин. Вклучувајќи го и овој дел од улицата Илинденска.

ЗАПАДНА ЕВРОПА

И покрај земјотресот од 1963 година и подоцнежната модернизација, сепак опстојале и докази дека градот пред стотина години се обидувал да го достигне шармот на западноевропските метрополи. Неколку згради на улицата Никола Кљусев (поранешна Максим Горки) сведочат за тоа.

АМЕРИКА

Живописното американско предградие е симбол за богатството и за економскиот напредок на САД. Но и во Скопје се граделе населби по сличен терк, кои што ја имале истата цел – да ги симболизираат удобноста и пристојниот живот на средната класа. Лисиче е една од десетината такви населби.

ЈАПОНИЈА

За цутењето на јапонските цреши веќе сме пишувале, а тие се сместени во западноевропскиот дел. Скопје има и друг јапонски симбол, мегапроектите на архитектот Кензо Танге од 1960-тите, особено станбениот комплекс Градски ѕид.

ХОЛАНДИЈА

Овој град не е премногу пријателски настроен кон велосипедите. Сепак, има барем еден дел каде што тие можат да бидат главни, како во Холандија. Покрај кејот на Вардар има велосипедски патеки долги дваесетина километри. Главно служат за рекреативно спортување, но бидејќи голем дел од градот е распослан покрај Вардар, некои ги користат и како мирен и безбеден пат до работното место.

БРАЗИЛ

Овде ја нема ниту Копакабана, ниту спектакуларните облакодери на Сао Пауло, но може да се видат сцени слични на бразилските фавели, на пример во познатата Топаана. Не дека фавелите се слика само за Бразил. Не постои поголем град во светот што нема делови завиткани во огромна беда, но бразилските станале познати поради користењето во поп-културата. Така, и Топаана си наоѓала свое место во филмовите и во музиката.

ИСТОЧНА АЗИЈА

Раздвижени трговски улици во кои дури и делови од коловозот се претворени во продажен простор, а не постои производ што не може да се најде на нив. Може да се сретнат од Тајланд па се` до Турција, но и во скопски Дуќанџик.

БАЛКАН

Кога во едно полууредено место се гледаат луѓе од различни класи, кои возат скапи, евтини или никакви автомобили, а живеат во своите големи и мали куќи што не изгледаат ниту посебно привлечно, ниту одбивно, туку сосема, сосема едноставно – тоа е Балканот. Тоа е и населбата Ѓорче Петров.

МЕНХЕТЕН

Во изминативе десетина години се појавија многу идеи што го носеа истиот работен наслов – скопски Менхетен. Замислата им е да се изградат висококатници на повеќе локации, а се предвидуваа максимални височини и до 500 метри. Засега единствените облакодери во Скопје се двете изградени (од четирите планирани) кули од проектот Sky City, високи по 130 метри. Тешко е да се претпостави дали Скопје ќе продолжи да се развива на овој начин, во височина.

Гоце Трпковски

фото: Хусамедин Гина

May 12, 2014
Шест едноставни совети за промовирање на локалниот туризам на Балканот

Прашајте кој било градоначалник во регионов за неговите/нејзините стратегии за локален развој и секој од нив особено ќе го истакнат значењето на туризмот. Скоро сите општини во регионот, урбани и рурални, го имаат туризмот при врвот на својата листа на важни стратешки цели. Нивните локални стратегиски документи и акциони планови редовно ги потенцираат локалните природни и културни ресурси и даваат идеи за тоа како тие да се искористат во промовирањето на оваа атрактивна индустриска гранка.

За жал, не сите тие имаат еднаков потенцијал за развивање на туризмот. Природните и културни богатства се од голема важност, но не се еднакво застапени во сите општини и подрачја. Исто така, често се случува постојниот природен и културен капитал да биде неправилно употребуван.

Желбата за занимавање со туризам треба да се избалансира во однос на тоа со кои и какви конкуренти се натпреварувате. Во оваа насока, важно е да се процени колку од расположивите ресурси можат да се насочат кон остварување на стратегиската цел, инаку, сè може да се претвори во залудно трошење на време и пари.

Но, и во случај општината да нема потенцијал за масовен туризам може да се натпреварува со одредена специфична карактеристика. Приказната понекогаш е поважна од површните естетски квалитети. Постојат примери кога голем број туристи посетуваат сиромашни места со мал културен потенцијал поради тоа што биле портретирани како егзотични места во некој игран или документарен филм. Понекогаш ваквата ситуација е навистина цинична, но секој прагматичар би ви кажал дека лош публицитет не постои.

Некои од причините поради кои луѓето мислат дека би можеле да живеат од туризам се:

1.Тоа изгледа лесно

2.Патриотизмот – луѓето ја сакаат својата земја па претпоставуваат дека и на другите би им се допаднала

Распространето е мислењето дека е доволно да се има убаво езеро или фини рустикални улици. Тоа секако е добра основа, но потребно е да се ефектуира преку понуда на одредени софистицирани услуги. Таквите услуги се многу поедноставни од, да речеме, софтверско програмирање, но во денешно време тие подразбираат способност да се користи некаков софтвер, нешто кое сè уште претставува проблем за многу туристички центри во регионот. Некои хотели, на пример, не прифаќаат плаќање со кредитна картичка за да се потврди резервацијата па ги условуваат гостите да дојдат порано на наведениот ден ако сакаат да си ја задржат резервацијата во врвот на летната сезона.

Размислувајќи како да ја унапредат туристичката понуда многу општини се понесени од идеи кои се премногу амбициозни. Понекогаш таквите скапи и ексцентрични проекти ги засенуваат поедноставните работи кои ни се потребни, како што се основната инфраструктура и услуги, или основната контрола на квалитет. Зошто би посетиле некој град кој реконструира историско востание и ги облекува жителите во облеки кои се носеле пред повеќе од еден век, ако не сте сигурни дека ќе имате сапун или крпа во вашата соба? Ова можеби звучи безначајно, но таквите работи се суштински за унапредување на туризмот.

Затоа, пред да започнат да размислуваат за големи, комплицирани или ексклузивни проекти, локалните власти треба да се фокусираат на основните работи. Тие не бараат премногу ресурси, а создаваат големи предности. Еве неколку од нив:

Прво. Поставете знаци на улиците и патиштата. Градоначалниците постојано ја истакнуваат важноста на туризмот но факт е дека посетителите не можат да се снајдат низ малите градови на Балканот. Како да дојдат туристите кога не можат да го најдат патот? Можеби ќе успеат да влезат и да го најдат центарот на градот, но ќе имаат проблеми да го најдат излезот бидејќи никаде нема обележани улици и знаци. Често се случува да се постават знаци на одредени места но, не и на критичните раскрсници, а тоа е исто како воопшто да нема знаци. Туристите се принудени да талкаат низ градот и да се вртат во круг. Секако дека можат да прашаат за правец, но единствено ако го познаваат јазикот на домаќините. Може да бидат опремени со GPS во денешно време, но тоа не е доволно добар изговор. Дури и најмалите општини можат да си дозволат ваков проект, затоа поставете знаци на улиците и патиштата. Не еден или два туку што е можно повеќе. Туристите се чувствуваат добро кога знаат каде се наоѓаат.

Второ. Потрудете се да го држите отпадот под контрола. Да, полесно е да се каже отколку да се направи, но, од друга страна доволен е еден брз поглед да се примети дека недостига таква грижа. Превработувањето во јавните комунални претпријатија е популарна пракса во регионот, но како е возможно да имате двојно зголемување на вработените во последните 7-8 години а проблемот со отпадот во меѓувреме се влошил? Потребен е фокусиран и постојан (а не повремен и еднократен) напор. Немате корист од организирање на фин летен фестивал помеѓу купишта отпадоци.

Трето. Поправете ги тротоарите. Поставувањето нови тротоари е скапа работа. Тоа не е потребно да се прави сè додека можат да се одржуваат постоечките. Туристите не сакаат дупки, испакнатини, искршени и извадени павер елементи. Поправките не чинат многу но значат многу. Никој не сака да се сопнува и постојано да внимава на секој чекор. Поентата е, не да се отвора тендер и да се смени сè, туку постојано да се одржува она што е веќе поставено.

Четврто. Направете едноставни летоци. Не изработувајте ексклузивни скапи каталози. Направете едноставна мапа, обележете ги главните туристички атракции и користете едноставен, разбирлив вокабулар. Погрижете се летоците да бидат насекаде достапни и на дофат. Бесцелно е да ги чувате во некоја општинска канцеларија или туристички инфо-центар кој не работи кога службеникот не е таму.

Петто. Помогнете во забавните содржини кои сепак најмногу припаѓаат во приватниот сектор. Туристите мора да имаат разонода. Постојат многу примери на услуги кои започнале од нула (планинарење, јавање магариња, возење низ кал, прошетки итн.), сепак тие треба да бидат добро организирани и промовирани. Треба да им помогнете, но да не ги преземате овие проекти ниту пак да трошите ресурси на нив.

Шесто. За крај, држете се до основните правила, особено ако не располагате со неограничен буџет. Постојат току многу основни работи што треба да се направат, така да не се занесувајте со скапи проекти како на пример – голф игралишта. Прво погрижете се за приоритетните работи.

Ристо Карајков

Др. Ристо Карајков е основач и директор на компанијата DeSo. Тој многупати има пишувано за политичките и економски случувања на Балканот, за развојот на граѓанското општество за академска и неакадемска читателска публика. Неговите написи се публикувани (меѓу другите) и во International Herald Tribune, New York Times, European Voice, World Politics Review, Osservatorio Balcani and Caucaso, Devex, New Business Europe, and Transitions Online. risto.karajkov@deso.mk

March 4, 2014
Грчка сарма

На Балканот многу имиња на јадења, обичаи и слично носат називи на соседни држави и поради тоа се претпоставува дека се типични за нив. Но, често се случува она што кај нас го носи името турски или грчки, во овие земји речиси и да не е познато или пак рецептот и изгледот на храната да е сосема поинаков. Но, иако расправата околу имињата овде е сериозна работа, сепак за вкусовите и храната не се расправа. Па одиме со нашиот рецепт за вас драги пријатели. Правевме грчка сарма, иако не сме сигурни дали и во Грција овој рецепт е познат под ова име или можеби изгледа поинаку 🙂

Состојки:

– Телешко или јунешко месо – 850 грама
– Три парчиња модар патлиџан сецкани на тенки гругови
– Пет парчиња црвен патлиџан сецкани на кругови
– Две китки магдонос
– Сол
– Бибер
– Зачин
– Црвен бибер
– Една чаша пиво

Подготовка:

Целото парче месо го пропржуваме кусо во тава со масло за да фати боја. Потоа додаваме околу половина литар вода, една чаша пиво, бибер, сол и зачин по вкус. Го оставаме да се динста околу час и половина. Потоа месото го вадиме и го сецкаме на тенки правоаголници. Малку ги запржуваме круговите модар патлиџан и ги оставаме на страна да се изцедат. Подготвуваме тава за печење. Во неа ставаме еден мал филџан зејтин и 250 милилитри пиво.

Месото кое сме го исецкале на правоаголници потоа го виткаме како сарма заедно со пржениот модар патлиџан. Ги редиме во тавата како сарми. Ги посолуваме и им ставаме малку бибер, половина лажичка црвен бибер и зачин по вкус. Ги покриваме со кругови исецкан црвен домат и ги ставаме во рерна да се печат околу еден час на температура од 200 степени.

Потоа ги вадиме од рерна. Врз целата површина на јадењето редиме свеж магдонос и повторно го ставаме во рерна да се допече уште половина час. Ако има потреба додаваме малку вода. Потоа јадењето се вади од рерна и се остава да се олади неколку минути. Највкусно е кога се јаде со овчо кисело млеко и црвено вино по ваш избор.

Не заборавајте да ги поканете и соседите 🙂

Добар апетит со Балкон3!

October 12, 2013
Гласајте за најдобриот краток филм на Балканот

Онлајн фестивалот за кратки филмови, altcineAction, е веќе започнат! Без разлика што Балканот е релативно мало место, Алтсин уште еднаш докажа дека овие земји се преполни со способни и креативни младинци. Како што претходно напоменавме, оваа година Алтсин го организира годишниот интернет фестивал за кратки филмови, altcineAction! Пријавувањето заврши во тек е гласањето!

Пријавени се вкупно 46 филма со вкупно времетраење од 360 минути и 16 секунди. На фестивалот учествуваат натпреварувачи од Грција, Република Македонија, Србија, Бугарија, Хрватска, Турција, Романија, Словенија, Албанија и Кипар.

Интернет корисниците од целиот Свет ќе бидат одлучувачката жири-комисија која ќе ги изгласа наградите за младите филмски продуценти. Гласањето започна на 9-ти септември и ќе заврши на 27-ми септември. Секој интернет корисник може да даде по еден глас за еден филмски наслов, но може да гласа и за повеќе филмови. Критиките и рецензиите кои посетителите на веб-страната на altcineAction ќе ги приложат заедно со нивната оценка се клучниот фактор за победа на нивниот омилен филмски наслов. Доколку сакате, можете да оцените, критикувате и рецензирате повеќе филмови. Тие што ќе критикуваат два или повеќе филма автоматски влегуваат во натпреварувањето за најдобар критичар на овогодинешното издание на altcineAction. Критиките може да ги напишете на 4 јазика: Грчки, Англиски, Француски или Германски. Истите можете да ги промените во кој било период пред завршувањето на фазата на гласање. Во случај на нерешен број на гласови, Вашите критики одлучуваат кој ќе биде победникот. Затоа, не чекајте до последниот момент и гласајте што е можно побрзо.

Правила за гласање:

– Гласањето ќе биде спроведено на интернет и е отворено за сите интернет корисници
– Техничкиот систем на платформата не дозволува да има повеќе гласа за истиот филм од една IP адреса
– Гласачите ја имаат можноста да го рецензираат филмот и да ја објаснат својата одлуга. Критериумите за гласање може да бидат технички, естетски, оценување според приказната, или пак едноставно ако сте мајка на продуцентот. Ова е направено со цел да се спречат луѓето од гласање само за еден филм, но и воедно ги прикажува филмовите на најголемата бројка гледачи.
– Во случај на нерешен резултат, филмот со најдобрите документирани причини од страна на критичарите ќе биде избран за победник.

Гласајте!

September 11, 2013
Бидејќи ова не е Холивуд, ова е Балканот

Балканскиот филм на дланка. „Битката“ со холивудските блокбастери може да почне. Балкон3 Ви ја претставува филм и видео платформата Алтсин, проект целосно и непоколебливо посветен на промоција на балканската кинематографија. Организирање интернет фестивали, новости и информации од филмскиот свет, статии, рецензии, критики се само дел од активностите на Алтсин. Без дилема најголем успех на Алтсин е што за две години постоење, во својата интернет кинотека успеа да собере корисни информации за 1034 филмски наслови и 8244 актери и филмски рабтници од Балканот. И секако, не планираат да запрат на овие бројки.

Altcine е платформа основана во 2011 година од Електра Венаки. Актери, продуценти, филмски техничари и филмската индустрија како целина имаат место на кое можат да комуницираат, да бидат во постојана интеракција со својата публика и да ги споделуваат заедничките интереси, со цел промовирање на филмските и видео продукции од балканските земји ширум светот. Филмските фанови од целиот свет имаат шанса да погледнат кон кинематографијата и киното од една сосема поинаква перспектива. Мисијата на Алтсин е да се зачуваат културните разлики помеѓу луѓето и народите, да се едуцира публиката и да се отворат нови врати за успех на уметници и професионалци во една мултикултурна средина.

Во 2012 година, по повод првата годишнина, Алтсин го претстави altcineAction!, првиот онлајн фестивал за краткометражни филмови од страна на балкански продуценти. Овој фестивал е навистина иновативен бидејќи им пружа шанса на младите филмски режисери и продуценти од Балканскиот регион да ја презентираат својата работа пред многубројната интернет публика.

Второто издание на altcineAction фестивалот е веќе во тек. На него можат да учествуваат кинематографи помлади од 35 години, а нивните филмови не смее да бидат подолги од 15 минути. Филмовите се прикачуваат на индивидуална веб страна, но примањето филмови трае додека не се исполни фестивалската квота од вкупно 360 минути. Потоа остварувањата се ставаат на тест пред немилосрдната интернет публика и почнува гласањето. Станува збор за одличен и иновативен концепт, кој ги охрабрува младите режисери да создаваат филмски дела.
Во 2012 година, фестивалот привлече 48 филма од 8 земји, 3500 критичари и 2900 регистрирани корисници, воедно нудејќи вредни награди овозможени од врвните фирми во аудиовизуелниот сектор.

Во моментот, Алтсин е дружина од реномирани професионалци од Грција во сферата на киното, аудиовизуелните уметности и информатичките технологии. Овие луѓе, без разлика на суровата економска клима, се посветени да креираат модерна, лесно користлива Интернет средина која ја промовира Балканската кинематографија.

Со задоволство сакаме да ја најавиме соработката помеѓу нашата веб-страна Балкон3 и грчката видео и филм платформа, Алтсин. Соработката ќе се состои од објавување интервјуа со филмски работници, промовирање на балканската кинематографија, презентирање куси филмови – учесници на AltcineAction фестивалот.

Благоја Стаматовски

September 6, 2013
Балкон3 рецепт за појадок: Гибаница

Гибаницата најчесто се јаде за доручек, но гурманите не ја одбегнуваат во било кое време од денот. Се јаде со кисело млеко, но може и со свеж зеленчук, домат или краставица, или пак кога веќе се мислите, може ајде и со црвено вино под услов ако се јаде во зима.

Состојки:

1/2 кг готови кори за Гибаница

200 мл. пресно млеко

200 мл. јогурт

200 мл. масло за јадење сончогледово

1/2 кг дробено сирење (кравјо)

200 мл. кисела вода

3 јајца

Подготовка:

Пресното млеко, јогуртот, киселата вода, јајцата, дробеното сирење и маслото за јадење се мешаат во подлабок и поширок сад. Откако состојките ќе се соединат и смесата ќе стане компактна, секоја кора една по една се става во смесата за да прими од состојките. Не треба да се држи во смесата подолго време, туку едноставно само да се потопи. Потопената кора се става во намрсено тавче. Корите се туткаат во тавчето една до друга. Во зависност од желбата на домаќинката или домаќинот, кората може да се стутка долгнавесто или пак во форма на круг, но важно е да бидат збиени една до друга бидејќи при печењето ќе нараснат заедно со приготвената смеса. Се остава една кора на страна која не ја ставаме во приготвената смеса. Таа кора се става најгоре во тавчето, односно сите кори се покриваат со неа. Откако сите кори ѓе ги потопите и наредите може од смесата да остане, но тоа не е проблем, туку уште подобро. Останатата смеса ја преливаме врз веќе приготвените кори. Откако сите кори ќе бидат наместени во тавчето во претходно загреана рерна на 200 степени целзиусови, гибаницата се пече на таа температура еден час. Јадењето е готово кога ќе видите дека корите се заруменети. Се вади од рерната и по желба може да се стави одозгора рендан пармезан кој е еден вид новитет за ова традиционално јадење одамна познато кај балканските народи.

Гибаницата е традиционалчно балканско јадење. Се правело од дамнина за дома како едноставно, секојдневно јадење, но ќе ја сретнете и на коктели и свечени вечери како предјадење. Рецептот кај балканските народи може да варира и во блага варијанта со смеса од јаболки, но сепак на крајот од неа да не излезе штрудла. Многу видови гибаница или бурек има низ сите земји на Балканот, од Словенија, Хрватска, Босна и Херцеговина, Србија, Македонија, Грција, Турција, Бугарија каде ова јадење се вика баница.

Според стари записи во прашливите библиотеки најдовме докази дека гибаницата се правела уште во византиско време, а била неизоставен дел од софрата во отоманската империја. Уживајте во појадокот со Балкон3 и не заборавете да ни испратите свој омилен рецепт кога ќе се сетите:)

Љубица Ристеска

March 23, 2013
Балкански инвеститорски форум

Иноватори и инвеститори од регионот, но и од западна Европа, Турција и Израел, ќе допатуваат на регионалната конференција во Скопје што ќе се одржи на 18 и 19 Април. На едно место ќе се соберат најдобрите иноватори од Балканот, голем број инвеститори од регионот, политичари што донесуваат одлуки во оваа област, големи и мали компании, академски истражувачи. Центар на сите случување ќе биде Метрополис Арената. Настанот е во организација на Фондацијата за развој на иновациите и претприемништвото на Балканот, под покровителство на председателот Ѓорѓи Иванов. Одлична прилика да го пријавите вашето учество и да дознаете кои се најновите инвеститроски трендови и да споделите дел од вашето знање. Картите можат да се купат онлајн на официјалниот сајт на организаторот. Таму ќе најдете и подетално инфо за сите учесници.

March 20, 2012