Balkon3

Category: На Балкон

  • Петнаесетдневно филмско уживање во градот на Босфорот

    Петнаесет дена, седум кино сали, над двеста филмови… Ова е личната карта на 31-то издание на филмскиот фестивал во Истанбул, кој ќе се одржи од 31 март до 15 април. Љубителите на седмата уметност ќе имаат можност да уживаат во домашни и странски филмови поделени во дваесетина различни секции.

    Фестивалот ќе го отвори филмот „Длабоко сино море“ на режисерот Теренс Дејвис, со Рејчел Вајз во главната улога. Во конкуренција за главната награда, „Златно лале“ се 11 странски филмови, кои или се фокусираат на уметнички теми или претставуаваат адаптација на некое литературно дело. Ќе ги издвоиме најновата екранизација на „Оркански висови“ на британската режисерка Андреа Арнолд, „Алберт Нобс“ со Глен Клоуз, која за оваа улога беше номинирана за Оскар за најдобра женска улога, „Најосамената планета“ со Гаел Гарсија Бернал и „Кат“ на еден од највлијателните ирански режисери, Амир Надери. Покрај ова, 12 домашни филмови ќе се борат за титулата Најдобар турски филм на годината. Исто така е предвидена и програма од неколку грчки филмови насловена „Што се случува во Грција?“.

    Картите за проекциите ќе чинат 15 турски лири или нешто повеќе од шест евра. Филмскиот фестивал во градот на Босфорот е најстар и најголем филмски фестивал во Турција. Во 2007- та година го посетиле рекордни 170.000 гледачи.  Како што велат организаторите, целта на фестивалот е да се поттикне развојот на домашната кинематографија, и во Турција да се промовираат квалитетни филмски остварувања од целиот свет. (М.Т.)

  • Финале со “Ankara wind quintet”

    Годинашните Денови на македонската музика завршуваат вечерва со два концерта. Во Музејот на Град Скопје во 20 часот ќе настапи составот „Ankara wind quintet“ од Турција, а од 21 часот ќе се одржи настапот на Мехмет Џан Озер, Мирослав Спасов и членовите на турскиот квинтет ќе одржат концерт на електронска музика.

    Ankara Wind Quintet

    “Ankara wind quintet” е формиран во 2006 година под раководство на Џем Онертурк и Анд Карабаџак, се состои од музичари кои се образовани во Германија и Англија. Целта на дувачкиот квинтет од Анкара била да се поддржи современата музика во Турција. Од основањето се до денес квинтетот има оддржано бројни премиерни изведби на дела од современи турски композитори.

  • Турците возат најскапи горива на Балканот

    По старото новинарско правило дека не вест дека куче каснало човек, туку дека човек каснал куче, медиумите повеќе не треба да објавуваат за зголемување на малопродажните цени на горивата, тука да објават кога ќе се намалат. Како своевидно дежаву, на две недели, постојано ги слушаме истите аргументи, кои иако неважни за обичните граѓани, регулаторната комисија се чувствува должна да ни ги пренесе. Поради зголемената цена на суровата нафта на светските берзи, намаленото производство на Блискиот Исток, промената на курсот на денарот во однос на доларот…. и што уште не. Како тоа нам да ни значи нешто, кога ќе отидеме до најблиската бензиска станица и ќе наполниме гориво по рекордно висока цена.

    Истражувавме на таа тема, ги компариравме цените на горивата во регионот и дојдовме до резултати кои прилично не изненадија. Она што е најинтересно во оваа анализа е цената на горивата во Турција, која е убедливо највисока во споредба со сите балкански, па дури и европски земји. Според официјалните дневни податоци на сајтот Fuel Prices Еurope, цената на еден литар супер 95 октани изнесува 1,936  евра или 4,630 турски лири. Од сите европски земји поскап бензин возат само во Норвешка, каде за еден литар се плаќа дури 2,043 евра.

    Во споредба на Балканот, покрај лидерот Труција, најскапо гориво ќе наполните во Грција каде за литар супер 95 октани ви требаат 1,813 евра. Со најновото зголемување на цената во Македонија, за истиот тип на гориво ќе платите 1.422 евра односно 87.5 денари. Очигледно, користењето на моторно возило повеќе не треба да се става во категоријата потреба туку луксуз. Ова не се однесува на жителите на Косово кои во моментов можат да се пофалат дека возат најевтино гориво во регионот, само 1.100 евра за литар супер 95.

    Токму поради неделните зголемувања на цените на горивата, сите оние планирани патувањето на годишен одмор, викенд или шопинг, со однапред вкалкулиран буџет, најверојатно ќе треба да биде предмет на посериозна ревизија и дополнување. Со оглед на најавите дека цената на горивата и понатаму ќе бележат пораст, не ви преостанува ништо друго туку да размислувате креативно како најекономично да стигнете до посакуваната дестинација.

    Затоа добро планирајте ја вашата рута и полнете гориво онаму каде што е поевтино. Ако тргнете со кола во Атина, според рутата која ја препорачуваат на релевантниот сајт Via Michelin, за дистанца од 705 километри за гориво во просек се потребни околу 75 евра, плус 18 евра за патарини. Најдобра опција е да го наполните резервоарот до горе и да возите со пристојна брзина, во надеж дека ќе поминете некој километар повеќе.

    Ако пак решите да одите на шопинг во Истанбул оваа авантура треба да ја планирате малку посериозно, со оглед на тоа што треба да транзитирате преку една земја. Опциите се преку Грција или преку Бугарија. Ако тргнете преку Грција за дистанца од 821 километри ќе потрошите колу 85 евра за гориво, плус четири евра за патарини. Постои и втора варијатна да патувате низ Бугарија, каде цените на горивото се поевтини -1,347 евра за литар супер и 1.363 евра за литар дизел- но треба поголемиот дел да го поминете на регионални патишта, а не на автопат. Оваа рута е пократка, но ќе ви треба повеќе време, па затоа и не важи за една од оние кои се препорачливи.

    Наш совет е како и да решите да патувате, да не тргнувате без неколку нешта. Полн резевоар, многу музика и добро одбрана екипа – најважен детал токму поради фактот што ќе имате со кога да ги поделите трошоците, а при тоа дружењето и добриот провод ќе ви бидат гратис.

    Македонија
    Супер 95 октани -1.422 евра/87.5 денари
    Дизел -1,215 евра/75,50 денари
    LPG – 0,794 евра/48,50 денари

    Грција
    Супер 95 октани -1,813 евра
    Дизел -1,591 евра

    Турција
    Супер 95 октани 1,936 евра/ 4,630  турски лири
    Дизел 1,669 евра/ 3,990 турски лири
    LPG 1,029 евра/ 2,460 турски лири

    Зоран Зафировски

  • Турски бизнисмен – светски рекордер во број на шаховски комплети

    Турскиот бизнисмен Акин Гокјај е сопственик на најголемата колекција шаховски комплети во светот. Тој во период од над 25 години успеал да собере 412 шаховски комплети од стотина различни држави.

    Оваа вредна колекција од 412 шаховски табли и 13184 шаховски фигури му овозможи во јануари оваа година да влезе во Гинисовата книга на рекорди. Гокјај, кој по професија е адвокат, почнал да се занимава со ова хоби, бидејќи уште како дете се вљубил во шахот како игра, но и како начин на размислување.

    „Шахот не е само игра, тоа е инструмент кој ги учи луѓето да размислуваат и да планираат. Исто така, тој ги отсликува културите на различните земји. Преку шахот можете да научите делови од историјата на многу земји“, вели Гокјај.

    Колекцијата на Гокјај вклучува шаховски сетови направени од многу различни материјали како метал, месинг, мермер, кожа, камен, па дури и рибина коска. За овие необични примероци, тој плаќал од 200 долари, па се до 1300 долари.

    Во неговата богата збирка може да се најдат шаховски фигури мотивирани од ликовите во познати книги или филмови, како Штрумфови или Господарот на прстените, но и фигури кои ги отсликуваат реалните политичките односи во светот низ историјата.

  • Во Њујорк презентација на новиот албум на Бојаџиев

    Васко Дуковски, нашиот веќе добро познат кларинетист, кој живее и твори во САД, денеска настапува во клубот „Дром“ во Њујорк,  каде што заедно со прекрасен тим изведувачи ќе го придружуваат македонскиот композитор, продуцент и пијанист Дуке Бојаџиев. Ќе биде презентиран материјалот од новиот албум на Бојаџиев „Сон. Верба. Љубов.“, кој се очекува да излезе наскоро.

    Дуке Бојаџиев

    Пред неколку дена на 21 март настапи и во Обединетите Нации по повод дебатата за меѓуетнички и меѓучовечки односи на Алијансата за цивилизации на ОН, организирана од претседателот на ОН, на кој изведе дела од познатиот српски композитор Александар Симиќ. Минатиот викенд со ансамблот за современа музика Арџенто имаше усшпешен настап изведувајќи седум премиери на дела компонирани од композитори од Универзитетот Колумбија (Columbia University).

    Васко Дуковски

    Новиот албум кој го работи заедно со ансамблот за современа музика Талеа, содржи дела од познатиот италијански композитор Фаусто Ромители (Fausto Romitelli) и ќе биде снимен наредниот викенд во мултимедијалниот културен центар “EMPAC” кој го поттикнува развојот на авангардни уметници и композитори.

  • Премиера на Скопје ремикс

    Македонската публика на 30 март премиерно ќе може да го види долгонајавуваниот музичко-филмски омнибус Скопје Ремикс. Проектот составен од девет кратки филмови на кој работеa дел од најавангардните млади режисери, меѓу кои Борјан Зафировски, Даријан Пејовски, Ѓорче Ставрески, Срѓан Јаниќијевиќ, Огнен Димитровски , Саша Станишиќ,Вардан Тозија, Синиша Ефтимов и Бојан Трифуновски .

    Според авторите, главна движечка сила на овој филм е неуништливиот дух на Скопје. Иако Скопје нема свои суперхерои какви што имаат Готам Сити -Бетмен и Метрополис -Супермен, сите негови граѓани се своевидни суперхерои. Наспроти сите економски и други ограничувања со кои се соочени послениве 15 години, тие секогаш успеваат да изнајдат начин да се забавуваат, да се вљубуваат, да искусат малку радост и среќа и да ја изиграат тмурната реалност што постојано им ја наметнуваат светските збиднувања.

    Од денес на страница на ПМГ рекордингс  за бесплатно симнување е достапен и официјалниот саундтрак работен од поголем број на бендови и музичари.

  • Кајмачина – Румелиско благо

    Кајмачината e лесно и вкусно благо од балканските простори. Благото се подготвува многу брзо и лесно, наликува на кремаста карамела, но недостасува карамелата.  Во оргиналниот рецепт за кајмачината не е предвидена рендана кора од портокал или ванила, но тоа се додава за да се потисне мирисот на јајцето, кое е основна состојка и го има во изобилство.

    Потребни состојки

    1 литар млеко

    5 јајца

    1 чаша за вода шеќер

    1 рендана кора од портокал или ванила

    Подготовка

    Јајцата и шеќерот се матат се додека шеќерот целосно не се раствори. Потоа во смесата се додава еден литар млеко и се продолжува со матење. Смесата од млеко, јајце и шеќер се става во еден стаклен сад, а потоа овој сад се става во друг сад (тенџере) полно со вода.

    Се пече во рерна загреана на 170 степени, се додека не добие светло кафена боја. Благото може да се сервира кога целосно ќе се олади. Овошен сос при сервирање е многу добра идеја…:)

     

  • Банско – Балканскиот Сент Мориц

    Банско – Балканскиот Сент Мориц

    „Цената на дневниот ски – билет чини 55 лева или околу 28 евра, па самите пресметајте дали е тоа скапо или евтино. Сепак ќе скијате на истите стази на кои скијала речиси целата светска елита во овој спорт, почнувајќи од Алберто Томба, Бојан Крижај, Херман Маер, Михаела Дорфмајстер, Ања Персон, Линдзи Вон…“

    „Пред почетната станица на гондолата во Банско или како што Бугарите го викаат „кабинков лифт“, во девет часот наутро е вистинска врвулица. Едно февруарско утро и јас со скиите на рамо стоев во долгата колона луѓе, кои говореа на различни јазици. Иако за да се дојде до место во гондолата се чекаше и подолго од половина час, кај луѓето не се чувствуваше нервоза. Веројатно сонцето и снегот, врз нив делуваа смирувачки. Но, сигурен сум дека сите беа нестрпливи што побрзо да уживаат во скијачките стази распослани на северните падини на планината Пирин“.

    Понекогаш природата и човекот заедно умеат да создадат прекрасни дела, а Банско дефинитивно е доказ за тоа. Од мал скијачки центар со неколку жичарници и ски-лифотви, и стари хотели, за десетина години, малото гратче со околу 10.000 жители се претвори во балкански Сент Мориц. За тоа придонесоа изградбата на голем број нови хотели и инвестицијата од 130 милиони евра во модерен ски-центар. Денеска Банско е најатрактивната зимска дестинација во Бугарија, но и во регионот, со скијачка сезона која трае речиси половина година.

    Од градот до скијачките терени може да се стигне со автомобил или со гондола. И за едното, и за другото се потребни околу 25 минути. Се разбира, возењето со гондола е многу поинтересно, но и поскапо. Билетот за едно лице чини десет евра.

    Кога се возите во гондолата или на некоја од жичарниците можете да чуете различни јазици, бидејќи Банско привлекува туристи од цела Европа. Најбројни се Англичаните и Русите, а не заостануваат ниту посетителите од соседните земји Македонија, Грција, Србија и Романија. Годишно Банско го потсетуваат над 600.000 туристи.

    Прекрасната природа и дивите планински предели наликуват на зимски пејсаж насликан од рацете на врвен сликар. Особено е импресивен погледот додека се возите на жичарницата кон највисоката скијачка патека, Бундерица, која се наоѓа на надморска височина од 2560 метри.

    А, потоа… Е потоа следува ново задоволство додека со брзина од педесетина километри на час се спуштате по одлично подготвените ски-терени. Нормално, следува загревање со кафе или чај, задоволство кое ќе ве чини од едно до две евра или пак освежување со пиво, за кое ќе треба да одвоите три евра. Вкупната должина на 16-те скијачки стази е над 75 километри, а цената на дневниот ски – билет чини 55 лева или околу 28 евра, па самите пресметајте дали е тоа скапо или евтино. Сепак ќе скијате на истите стази на кои скијала речиси целата светска елита во овој спорт, почнувајќи од Алберто Томба, Бојан Крижај, Херман Маер, Михаела Дорфмајстер, Ања Персон, Линдзи Вон…

    „Секој февруари светската ски елита ги испробува силите на патеката „Томба“, која името го добила по италијанската скијачка легенда Алберто Томба. Мештаните раскажуваат дека подготовката на стазата трае подолго од еден месец.“

    Од 2008 година во Банско се одржуваат натпревари во рамките на Светскиот куп во скијање – најпрестижното натпреварување во овој спорт. Секој февруари светската ски елита ги испробува силите на патеката „Томба“, која името го добила по италијанската скијачка легенда Алберто Томба. Мештаните раскажуваат дека подготовката на стазата трае подолго од еден месец. Ова е еден од најзначајните спортски настани во Бугарија, кој привлекува илјадници гледачи од земјата и од соседството.

    И на оние, кои не се по зимските спортови, нема да им биде здодевно. Во сите хотели има затворени или отворени базени, сауни, фитнес сали… Во Банско денес има околу 200 хотели, но сеуште интензивно се гради. Цените се различни и за еден полупансион се движат од 20 евра, па нагоре. Посебна атракција во Банско се популарните „механи“, гостилници во кои може да уживате во традиционални јадења и бугарска народна музика за прифатливи цени. Оние кои се расположени за поинаков вид забава можат да изберат помеѓу големиот број пабови, ноќни клубови и дискотеки.

    Посетителите од околните земји до Банско најчесто патуваат со автомобил. Од Скопје до Банско има околу 260 километри и се оди преку граничниот премин Деве Баир. Доколку не чекате на граница и временските услови се добри за возење, патувањето трае четири часа.

    Од Солун е малку поблиску и растојанието од 220 километри се минува за нешто повеќе од три часа. Туристите од Грција кон Банско патуваат преку граничниот премин Кулата. Од Истанбул до Банско има 573 километри и веројатно тоа е една од главните причини што таму речиси нема туристи од Турција. Посетителите од подалечните европски земји најчесто патуваат со авион до Софија, а потоа со автобус до Банско. Како и да патуваат, мислам дека сите си заминуваат со прекрасни спомени од скијачкиот центар, кој заслужено го доби епитетот „Скијачкиот дијамант на Источна Европа“ (The ski diamond of Eastern Europe).

    Мирко Трајановски

  • Девет Грци, 35 Турци и еден Македонец меѓу 1000 најбогати во светот

    „Можете да го промените светот. Дејствувајте веднаш. Ова е пораката на најбогатиот Грк на светот, Џон Пол Деџориа до сите градежни претприемачи во светот.“

    Најбогатиот Грк на новата листа на милијардери на Форбс, се уште е Џон Пол. Спиро Латсис падна од првото место на најбогат Грк во Грција, откако на врвот на најбогатите се искачи Аристотелис Мистакидес. Така што новата листа на Форбс за 2013/2014 која ќе почне да се прави на лето, ќе биде многу интересна за читање.

    Грчките милијардери од грчката листа на најбогати, како Стелиос Хаџијоану и Алки Давид од Велика Британија и семејството Хасеотес од САД не се најдоа на листата на Форбс. Мајк Лазаридес од Канада, кој е основач и извршен директор на РИМ, производителот на Блекбери и порано вредеше над 2,2 милијарди долари, сега е исфрлен од листата на Форбс. Меѓу првите 1000 најбогати на Форбс се наоѓаат девет Грци или милијардери од грчко потекло. Џон Пол Деџорија и неговата фирма Hair Products е на 276 место, со 4 милијарди долари,  на 418 место е Аристотелис Мистакидис, Glencore Internacional со 2,2 милијарди долари. По нив на 464 место доаѓа банкарскиот магнат Спиро Латсис, па на 491 место Филип Ниакрос, Art Collection, Џорџ Мичел, Oil&Gas, САД,  на 634 место Џон Кастиматидис, Oil/Real estate,  683 место Џим Дејвис, New Balance, па Мајл Јахарис, Pharmaceuticals, и на 719 место Џорџ Аргирос, Real Estate.

    На листата на Форбс, меѓу најбогатите 1266, се намали и бројот на богатите Турци. Од 39 богати Турци на минатогодишната листа, сега Форбс во најбогатите вброи 35 турски државјани, од кои еден турски бизнисмен од турскиот дел на Кипар. Со 3 милијарди долари, претседавачот на Фиба Холдинг, Хисни Озјегин е највисоко рангираниот Турчин на листата, иако од минатогодишното 317 место падна на 377 место. Со 2,9 милијарди долари, на 401 место следува Мехмет Емин Карамехмет, претседавач на Чукурова Холдинг. Скок за над 40 места, од 463 место на 418 место на листата најбогати направо Мурат Улкер, претседавачот на Јилдиз Улкер (Yildiz Ulker), компанијата која ја гупи познатата Годива Чоколади (Godiva Chocolates). По него, на 491 место е Рами Коч, сопственик на Коч Холдинг, во Македонија познат по трговските центри Рамстор.

    Меѓу најбогатите во светот, на 521 место на листата на Форбс има еден Македонец, Мајкл Илич, со најголемата бизнис империја во Мичиген. Сопственик е на хокеј клубот Детроит Ред Вингс, безбол тимот Детроит Тигри, а поседува и 15 отсто од НБА-тимот Детроит Пистонс. Тој е препознатлив и по синџирот ресторани за брза храна Little Ceaser’s pizza, со 4000 ресторани низ целиот свет.

    И оваа година на прво место на најбогатите во светот останува Максиканецот Карлос Слим со 69 милијарди долари, пред Бил Гејтс кој има 61 милијарда долари. (Д.Ч.)

  • Турски Ефес со грчки тренер атакува на успеси

    „Назначувањето на грчиот селектор како главен тренер на тимот од Анадолија претставува вртење на нова страна во турската кошарка, па и спортот воопшто, со оглед на  ривалитетот помеѓу овие две земји.“

    Турскиот  гигант, ‘ Анадолу Ефес ‘, доби нов тренер. Бордот на директори се реши коримилото да му го додели на досегашниот селектор на Грција и поранешен тренер на литвански Жалгирис, Илиас Зурос. Тој доаѓа на местото на Уфук Сариџа, кој не ги исполни очекувањата  на управата и навивачите. Амбициите на ‘ пиварите ‘ за оваа сезона беа поврзани најмалку со пласман на фајнл- форот, и за таа цел ростерот на тимот беше засилен со докажани кошаркари. Душко Савановиќ, Станко Бараќ, повратникот од НБА лигата, Саша Вујачиќ се само дел од имињата кои беа доведени.

    Дополнителен мотив кај сите во клубот претставуваше фактот дека финалниот турнир оваа сезона ке биде одигран од 11 до 13 Мај токму во Истанбул. Сега е јасно дека ‘ домаќинот ‘, нема да биде учесник на истиот. Како главен виновник е апострофиран Сариџа, па одлуката за негов отказ не ги зачуди навивачите.

    Она што предизвика негодување кај мал дел од навивачите на Ефес, е поставувањето на Зурос за нов главен тренер. Во историјата на турската кошарка, Илиас е само втор тренер кој доаѓа од Грција, но неговото доаѓање предизвикува многу поголемо внимание од она на Дикеулакос кој го предводеше женскиот тим на Фенербахче. Генералниот менаџер на Анадолу, Енгин Озерхун изјави дека сите во клубот се свесни за чекорот кој го превземаат. ‘ Резултатите не доведоа до оваа точка. Селекторот на Грција е и нов тренер на Ефес. Му посакуваме добредојде во Истанбул во име на сите искрени навивачи на нашиот тим ‘ – порача Озерхун.

    Назначувањето на грчиот селектор како главен тренер на тимот од Анадолија претставува вртење на нова страна во турската кошарка, па и спорт воопшто, со оглед на  ривалитетот помеѓу овие две земји. Прв приоритет на Зурос, како што тој самиот вели, ќе биде враќање на самодовербата кај играчите. ‘ Овој тим е создаван за големи дострели и поседува квалитет кој е кадарен за тоа. Тоа е првото што сите во клубот мораат да го сфатат, односно повторно да веруваат во тоа. Чест ми е да бидам дел од овој тим, и се надевам дека заедно ќе дојдеме до големи успеси ‘- соопшти Илиас Зурос.

    Дел од овој тим е и македонскиот репрезентативец Владо Илиевски, кој во моментов е позајмен во руски Локомотив. Пред него дресот на Ефес со голем упсех го носеше и поранешниот капитен на македонската селекција, Петар Наумовски. Зурос е тренер кој форсира силна игра во одбраната со брзи контранапади како главно оружје, па се очекува Илиевски да се вклопи добро во новиот мозаик. Во игра за Анадолу сеуште е пехарот во домашното првенство, и тоа е примарна цел на новиот тренер.

    Мислењата се поделени. Некои сметаат дека ова е вистинска одлука во вистински момент. Останатите мислат дека Зурос ќе се обиде да го вметне ‘ грчкиот стил ‘ на игра во околина која не е создадена за тоа. Но во едно се согласни сите. Спортот повторно покажува дека нема граници и предрасуди кога се бараат успеси. Ефес со новиот тренер го обновува проектот ‘ final four ‘, а останува да видиме како грчкиот селектор ке се снајде на ‘ жешката ‘ клупа на турскиот гигант..

    Александар Николовски