Balkon3

Tag: Турција

  • “АNDDDD TWELVE POINTS GOOOO TOOOOO, ТURKEY!!!!”

    Балкон3 ви ги претставува победничките песни за Евровизија на Турција, Грција и Македонија.

    „Со младиот Џан Бономо, кој успее да привлече внимание со интересниот стил и специфична музика,Турција, во Баку атакува на втората победа, после онаа на Сертап Еренер, во 2003 година.  “

    Евросонг! За некои луѓе тоа е активност која минува во сенка на политички настани. Нивните критики одат да таму, што `тврдат` дека натпреварот бил измислен за тестирање на исправноста на телефонските линии во Европа. Најострите критичари пак велат дека тоа е час по историја и географија, особено кога ќе се започне гласањето. За многумина пак, Евросонг е најпознатиот музички натпревар во Европа, забавна средба на европските култури, чија основна цел е после војната да се промовира културната интеракција и да се зајакне музичката поп сцена. Истовремено поттикнување на конкуренцијата меѓу композитори и изведувачите. На овие натпревари за прв пат тестирани се и новите технологии како што се безкабловските микрофони, jimmy jib, virtual studio technology и најновите осветлувачки технологии.  Порталот Балкон3 ќе ви помогне од блиску да го запознаете момчето коe што за кратко време успеа да придобие голем број на фанови.

    http://www.youtube.com/watch?v=d_F6H6–FrU

    СЕ ЗАПОЧНА СО КУПЕНАТА ГИТАРА

    Џан Бономо има 24 години, роден е во Измир, уште на 8 годишна возраст започнува да свири на гитара. Дипломирал на Универзитетот `Билги` на факултетот за филмска уметност.

    `Кога дознавме дека ќе ја преставувамe Турција на овогодишниот Евросонг бевме многу изненадени. Воопшто не размислувавме за такво нешто. Тоа е прекрасна и горда работа` изјави Џан Бономо, веднаш откако дозна за прекрасната вест. За тоа како ја започна музичката кариера Бономо вели: `Кога имав 8 години живеев кај бабами. Едно попладне моите родители пиеја чај и правеа муабет. Синот на соседот почна да свири гласно на електрична гитара. Баба ми не поднесуваше гласна музика, затоа ме испрати кај соседот да го замолам да го намали гласот. Го замолив батко ми Зафер да го намали гласот. Откако му го кажав тоа, како реакција почна да ги свири песните на култните групи The Beatles и The Kinks уште погласно. Бев импресиониран од тоа што го видов. Останав да го слушам до крај. Кога се вратив дома на мајка ми и кажав дека сакам да станам музичар и да ми купи гитара. Ја убедував неколку недели, на крајот ми ја купи гитарата и така започнав да одам на курс.` 

    Бономо, поезија пишува од млада возраст. Првата песна ја има напишано на 11 години, првата композиција на 14 години. На неговите стихови и музика најмногу влијаеле поетите, писателите потоа режисерите, музичарите пак најмалку. `Најмногу сум импресиониран од Назим Хикмет, Мевлана, Џим Џармуш, Кјубрик и Годард. Мојата прва девојка ме убеди професионално да се занимавам со музичката уметност, мајка ми ме поддржа во секој момент, сестра ми пак остави впечаток во мојата музика` изјави Бономо. Џан Бономо песната ја опишува многу кратко. Тоа е `Истанбулска музика` вели тој.

    УМНА И ЗАБАВНА ПЕСНА

    Музичките авторитети евровизиската песна на Џан Бономо ја коментираа како многу успешна, негативни коментари воопшто немаше. `Искрено да ви кажам не очекував толку умна и итра песна. Забавна песна. Има јасен концепт кој што е изработен со замисла. Комбинација на балканска и османлиска музика. Има мали елементи од Горан Брегович, содржи елементи од фолкот и рок музиката. Од тој поглед мислам дека е завршена добра работа. Но морало малку повеќе да се работи на песната, аранжманот е многу сложен, според логиката на Евровизија требало малку да биде поедноставна. Модалните својства на песната добро прозвучуваат со англискиот јазик` рече познатата ТВ коментаторка.  Медиумите кои понекогаш можат да бидат немилосрдни уште од првиот ден песната ја оценија како многу добра, ја поддржаа, тоа за Бономо е голема шанса. Негативни критики имаше од аспект на тоа како изгледа на сцената. Треба да работи многу за да стане звезда. Кога ќе излезе на сцена личи на дете, треба да има уметнички став. Според критичарите кога дава изјави е многу слаб, во одговорите има хумор, треба на тоа да обрне големо внимание.

    Хусамедин ГИНА

  • Летни музички фестивали – Турција

    Tuborg Gold фестивал (Истанбул 4 -7 јули)
    Три дена неповторливо музичко рок доживување. Истанбул е градот во кој мора да бидете од 4 до 7 јули. Одличен три дневен фестивал со импресивна програма. Доволно е да се споменат Guns N’ Roses, Evanescence, Apocalyptica, Within Temptation,In Flames, Ugly Kid Joe и веднаш ќе ви стане јасно дека станува збор за еден од најквалитетните регионални фестивали. Локацијата на одржување на концертите е комплексот Паркорман, кој се наоѓа во познатата бизнис населба Маслак.

    Блок карта за трите дена чини 63 евра. Дефинитивно ова е фестивал кој љубителите на рокот никако не смеат да го пропуштат. Ако сте еден од нив ова е идеална прилика да уживате во одлична музика и да направите шопинг тура низ прекрасниот бисер на Босфорот. Со оглед на тоа што концертите започнуваат попладне и нема организиран кампинг простор, каде што може да преспиете, ќе мора да најдете сместување во Истанбул. Наша препорака е тоа да го направите преку сајтот booking.com, каде можете да избирате помеѓу 1061 хотели кои ви стојат на располагање. Има за секого по нешто.
    www.tuborggoldfest.com

    Istanbul Jazz Festival 2012( Истанбул, 3-19 јули)
    На повеќе од 20 локации, закажани се 50 концерти на кој ќе настапат речиси 300 изведувачи. Од 3 до 19 јули, Истанбул ќе пулсира во џез ритам. Фестивалот кој оваа година се одржува по 19 пат, докажа зошто е еден од најквалитетните и најпознатите џез фестивали во светот. Оваа година настапуваат Keith Jarrett, Gary Peacock, Jack DeJohnette, Morrissey, Erykah Badu, Antony and the Johnsons, Esperanza Spalding, Marcus Miller…

    Најочекуван концерт оваа година е светската премиера на The Istanbul Project во кој Marcus Miller ќе настапи со познати турски музичари во знак на одбележување на еден голем јубилеј, 40 години од формирањето на Истанбулската Фондација за Култура и Уметност. Карти можете да купите или резервирате на сајтот www.biletix.com.

    Three of Life (Измир, 28 јуни -3 јули)
    Организаторите за Тhree of Life, велат дека ова е најголемиот мал фестивал на електронска музика во светот. Се одржува во близина на градот Измир, покрај езерото Карагол, каде е предвиден и делот за кампирање. Најавени се дел од најпознатите светски диџеи и музичари, кои ќе настапуваат на неколку тематски поставени сцени. За 90 евра, колку што чини билетот, во кој е вклучен и кампинг место, сите оние кои ќе одлучат да бидат дел од овој фестивал, ќе имаат прилика цели пет денови да уживаат во techo, progresiv, psytrance и chill out музика.

    Што се однесува до дилемата како да стигнете на овој фестивал, ако сте поголема екипа, тогаш најдобро е да патувате со автомобил. Од Скопје до Измир има 1031 км, а од Солун 811 километри. Сепак наш предлог е да одберете авионски превоз кој ќе ви заштеди време, но и пари. Местото на одржување на фестивалот се наоѓа на само 65 километри од Измирскиот аеродром. Се уште имате време да резервирате евтин авионски билет, преку авиокомпанијата Pegasus која редовно лета до Измир.

    На официјалниот сајт можете да купите карти и да ја погледнете комплетната листа на изведувачи festival.electreelife.com

  • Прошетка низ Отоманското наследство на Скопје

    Екипата на Балкон 3 во неделата имаше можност да присуствува на еден навистина несекојдневен и интересен настан. Станува збор за тричасовна прошетка низ Отоманското наследство на Скопје, која за сите заинтересирани бесплатно ја организира археологот и туристички водич, Василка Димитровска. Заедно со уште шеесетина љубопитници посетивме четири џамии, изградени во 15-от век (Султан-муратовата џамија, Гази Иса Беговата џамија, Исхак Бег (Алаџа) џамијата и Мустафа-пашината џамија). Потоа групата се запозна и со историјата на Скопското Кале, Куршумли ан, Даут-пашиниот амам, Капан ан, Сули ан и Безистенот во Старата скопска чаршија. На крајот сите беа среќни што научија многу интересни работи за Скопје, но во исто време и изненадени колку малку знаеле за Отоманското наследство на главниот град. За неколку дена на Балкон 3 ќе имате можност да погледнете видео приказ од прошетката, а засега уживајте во фотографиите, кои ги издвоивме за вас.

    Мустафа-пашината џамија, изградена во последната деценија од 15-от век од Мустафа паша, е еден од најубавите споменици изградени во Скопје за време на турското владеење.
    Туристичкиот водич Василка Димитровска ја раскажува историјата на Мустафа-пашината џамија
    Посетителите слушнаа интересни детали и за Скопското кале
    Калето во Скопје, изградено во шестиот век за време на византиското владеење, импозантно се издига на левиот брег на реката Вардар.
    Дел од прошетката беше и Капан ан – некогаш преноќиште за трговците и патниците – намерници, денеска место каде што може да уживате во храна, чај и наргиле.
    Сули ан е изграден во 15-от век, а името Сули, кое значи „воден“ го добил, бидејќи во негова близина минувала реката Серава. Денеска во анот е сместена Ликовната академија во Скопје.
    Прошетката заврши во Безистенот – еден од најубавите објекти во Старата скопска чаршија, кој има огромна културно – историска вредност.
    Во Безистенот посетителите имаа можност да дегустираат и да се освежат со неколку видови ладен чај
    Впечатоци од прошетката пред камерата на Балкон 3

    Мирко Трајановски

    фото: Софија Семенпеева

     

  • Виртуелна музејска тура низ најпознатите грчки музеи

    Дали би сакале одблиску да ѕирнете во малку познатите фотографски архиви на Бенаки музејот на грчката цивилизација, да прошетате низ архаичниот хол на Акропол или да ги проучувате ретките лабораториски слики на објекти во музејот на Кикладската уметност?

    Благодарение на соработката која претставниците на овие три познати грчки институции ја остварија со Google, од неодамна уживањето во античката уметност е достапна со само еден клик. Се што треба да направите е да го посетите сајтот www.googleartproject.com и да уживате во несекојдневното искуство виртуелно да прошетате низ овие музеи.

    Во музејот на Кикладската уметност достапни се 159 дела на 15 артисти, додека во Бенаки можете да видите 510 дела на 95 артисти. Посебно интересна е виртуелната прошетка низ античкиот хол во Акропол, каде благодарение на фотографиите сликани во голема резолуција  со 24 мегапиксели и технологијата street view навистина ќе добиете чувство дека во живо имате прилика да ги разгледувате античките уметнички дела.

    Акропол, Бенаки и музејот на Кикладскaта уметност засега се единствените грчки музеи кои се достапни на Google арт, но според најавите постојат реални шанси бројот на музеи во иднина да се зголеми.

    Овој проект на Google за виртуелно презентирање на познатите музеи започнат во февруари 2011 година досега успеа да оствари соработка со повеќе од 150 музеи од 40 земји од целиот свет. Најголем број се од Европа, но ги има од сите континенти. Покрај Грција, на Google Art се достапни и два музеи од Турција. Музејот Пера во Истанбул и Сакиб Сабанчи музејот каде може да се видат навистина интересни дела од калиграфската уметност.

  • КОШАРКАРСКИОТ ЖОЗЕ МУРИЊО

    Харизматичниот скромен лидер на кошаркарскиот клуб Галатасарај од Истанбул, Октај Махмути, годинава е избран за најдобар тренер на ULEB Eurocup. Скопјанецот Октај, задоволен од тоа што неговите фанови го споредуваат со Мourinho, но објаснува: “Побелена ми е косата, најверојатно тоа е главната причина што велат дека личам на популарниот фудбалски стратег Мурињо“.

    Нема точно одреден пат што води до успехот, бидејќи тој е многу сложен. Тоа многу добро му е познато на скопјанецот Октај Махмути, во изобилство на голема конкуренција, но со макотрпна работа успеа да стане еден од најпознатите кошаркарски тренери во Турција и во регионот. Годинава е избран за најдобар тренер во ULEB Eurocup. “Многу сум среќен. Убаво е да се добие благодарност за тоа што го работите со години“, вели тој.

    СПОРТОТ Е УМЕТНОСТ

    Октај Махмути, кај и да работи има само една цел. Клубот каде што е тренер да биде на самиот врв, и во домашното првенство и во Европските купови. Затоа на клупата понекогаш може да биде многу темпераментен. “Кога ќе изгубиме, за жал многу им се лутам на моите играчи. Всушност не би се налутил ако на паркетот се применува она што претходно се договараме, ако се примени ќе нема никаков проблем. Моите реакции никогаш не се за претрпениот пораз. Нормално дека и тоа е дел од спортот. Едноставно она што сакам е мојот играч на теренот да даде се од себе, сто процентен перформанс. Ако тоа го исполнат ќе нема место за лутење“, вели Махмути.

    Според него, да се биде спортист од највисок ранг е една од најтешките работи во светот. “Тоа е уметност, нема никаква разлика. Потребна е вештина и среќа. Треба да се наоѓате на вистинско место во вистинско време. Исто така потребно е да се вложи голем труд. Најмногу ми е жал што денес младината која се занимава со спорт, го занемарува образованието. Оваа работа е иста како да градите пирамида, од дното почнуваат илјада луѓе, на врвот завршува само еден“.

    КОШАРКА – ПРИЈАТЕН И УБАВ СПОРТ

    Октај Махмути е роден во Скопје. Фудбалот му е првата окупација. Со кошарката почнува да се занимава многу подоцна, дури во средното училиште. “Во тогашна Југославија имаше многу квалитетни екипи и голема конкуренција. Ми стана јасно дека нема да можам да станам добар, врвен кошаркар. Затоа одлучив да станам тренер“, раскажува Махмути. Првото тренерско искуство Октај го има во тимот на Работнички. Меѓународното пак во Еџзаџибаши, во 1991 година, а потоа  следуваат секогаш атрактивниот Ефес, италијанскиот Бенетон и сега во Галатасарај, еден од најеминентните турски кошаркарски клубови. “Среќен сум што сум во Галатасарај. Кошарката е многу пријатен и убав спорт. Денес најголемиот проблем во турската кошарка се гледачите. Дури и кога гостуваат познати клубови, понекогаш се забележува дека салата е празна, тоа е многу разочарувачка состојба. Во турската кошарка има ѕвезди, останува само публиката да ја доведеме во кошаркарските арени“, објаснува Махмути.

    Дирк Новицки – Европска супер ѕвезда

    Идол на Октај е познатиот југословенски тренер Божидар Маљковиќ. За Петар Наумоски вели дека во Ефес Пилсен, од добар играч, станал вистинска кошаркарска ѕвезда. “Тоа време Ајдин Орс, тренерот на Ефес, бараше бек. Го препорачав Наумовски. Дојде, тука покажа многу добри перформанси, секој изминат ден беше се подобар“, додава Махмути. Според него моментално најдобриот европски кошаркар е Дирк Новицки, кој може да ја промени судбината на целата екипа.

    “Се обидувам да се облекувам елегантно, сам се грижам за гардеробата, така се чувствувам убаво, а за тоа што велат дека личам на Мурињо, најверојатно е заради побелената коса“, објаснува, и за крај додава: “Моите соништа се исполнети, желбата ми беше да бидам тренер во големи клубови, таа желба ми е исполнета. Сега најважно е да успеам да опстанам на ова ниво. Исто така и клубот каде што сум тренер да биде на самиот врв“. 

    Хусамедин Гина

  • Турците возат најскапи горива на Балканот

    По старото новинарско правило дека не вест дека куче каснало човек, туку дека човек каснал куче, медиумите повеќе не треба да објавуваат за зголемување на малопродажните цени на горивата, тука да објават кога ќе се намалат. Како своевидно дежаву, на две недели, постојано ги слушаме истите аргументи, кои иако неважни за обичните граѓани, регулаторната комисија се чувствува должна да ни ги пренесе. Поради зголемената цена на суровата нафта на светските берзи, намаленото производство на Блискиот Исток, промената на курсот на денарот во однос на доларот…. и што уште не. Како тоа нам да ни значи нешто, кога ќе отидеме до најблиската бензиска станица и ќе наполниме гориво по рекордно висока цена.

    Истражувавме на таа тема, ги компариравме цените на горивата во регионот и дојдовме до резултати кои прилично не изненадија. Она што е најинтересно во оваа анализа е цената на горивата во Турција, која е убедливо највисока во споредба со сите балкански, па дури и европски земји. Според официјалните дневни податоци на сајтот Fuel Prices Еurope, цената на еден литар супер 95 октани изнесува 1,936  евра или 4,630 турски лири. Од сите европски земји поскап бензин возат само во Норвешка, каде за еден литар се плаќа дури 2,043 евра.

    Во споредба на Балканот, покрај лидерот Труција, најскапо гориво ќе наполните во Грција каде за литар супер 95 октани ви требаат 1,813 евра. Со најновото зголемување на цената во Македонија, за истиот тип на гориво ќе платите 1.422 евра односно 87.5 денари. Очигледно, користењето на моторно возило повеќе не треба да се става во категоријата потреба туку луксуз. Ова не се однесува на жителите на Косово кои во моментов можат да се пофалат дека возат најевтино гориво во регионот, само 1.100 евра за литар супер 95.

    Токму поради неделните зголемувања на цените на горивата, сите оние планирани патувањето на годишен одмор, викенд или шопинг, со однапред вкалкулиран буџет, најверојатно ќе треба да биде предмет на посериозна ревизија и дополнување. Со оглед на најавите дека цената на горивата и понатаму ќе бележат пораст, не ви преостанува ништо друго туку да размислувате креативно како најекономично да стигнете до посакуваната дестинација.

    Затоа добро планирајте ја вашата рута и полнете гориво онаму каде што е поевтино. Ако тргнете со кола во Атина, според рутата која ја препорачуваат на релевантниот сајт Via Michelin, за дистанца од 705 километри за гориво во просек се потребни околу 75 евра, плус 18 евра за патарини. Најдобра опција е да го наполните резервоарот до горе и да возите со пристојна брзина, во надеж дека ќе поминете некој километар повеќе.

    Ако пак решите да одите на шопинг во Истанбул оваа авантура треба да ја планирате малку посериозно, со оглед на тоа што треба да транзитирате преку една земја. Опциите се преку Грција или преку Бугарија. Ако тргнете преку Грција за дистанца од 821 километри ќе потрошите колу 85 евра за гориво, плус четири евра за патарини. Постои и втора варијатна да патувате низ Бугарија, каде цените на горивото се поевтини -1,347 евра за литар супер и 1.363 евра за литар дизел- но треба поголемиот дел да го поминете на регионални патишта, а не на автопат. Оваа рута е пократка, но ќе ви треба повеќе време, па затоа и не важи за една од оние кои се препорачливи.

    Наш совет е како и да решите да патувате, да не тргнувате без неколку нешта. Полн резевоар, многу музика и добро одбрана екипа – најважен детал токму поради фактот што ќе имате со кога да ги поделите трошоците, а при тоа дружењето и добриот провод ќе ви бидат гратис.

    Македонија
    Супер 95 октани -1.422 евра/87.5 денари
    Дизел -1,215 евра/75,50 денари
    LPG – 0,794 евра/48,50 денари

    Грција
    Супер 95 октани -1,813 евра
    Дизел -1,591 евра

    Турција
    Супер 95 октани 1,936 евра/ 4,630  турски лири
    Дизел 1,669 евра/ 3,990 турски лири
    LPG 1,029 евра/ 2,460 турски лири

    Зоран Зафировски

  • ТИВКА И СКРОМНА ГОСПОДАРКА НА ХАРЕМОТ

    “Популарноста е некое чудно чувство, понекогаш е малку непријатно, одземена ти е слободата, постојано сте следени. Но тоа е составен дел од животот на популарно телевизиско лице“ , објаснува, Филиз Ахмет позната како Нигар Калфа од серијата “Величествениот Султан“.

    Нигар Калфа е личност со голема самоконторола, секогаш се држи на растојание од останатите девојки од харемот. Таа е темпераментна, но и таинствена. Задолжена е да се грижи и да ја советува Хурем, големата љубов на Величенствениот Султан.

    Во екслузивното интервју за порталот localhost/balkon3-multisite популарната скопјанка вели: “Им благодарам на сите мои сограѓани што ја следат серијата и тие што многу ја сакаат Нигар Калфа. Не би можела да кажам од каде потекнува таа љубов, сепак најдобро е да ги прашаме самите гледачи. Но само во едно сум сигурна, многу си ја сакам работата, верувам во неа и во карактерот кој го толкувам“.

    Како живеете со славата што ја имате во Турција? Ве препознаваат ли, ве запираат ли на улица, ја прашуваме популарната скопјанка.

    “Не знам, тоа е некое чудно чувство, понекогаш е малку непријатно, одземена ти е слободата, постојано сте следени. Тоа е составен дел од животот на познато телевизиско лице. Мораме да сме трпеливи. Генерално добивам убави реакции“, објаснува Филиз Ахмет.

    Серијата “Величествениот Султан“ веднаш по почетокот на прикажувањето во Турција и истовремено во повеќе други европски земји, така и во Македонија, се здоби со висок рејтинг. Дали е свесна за нејзината популарност и за гледаноста на серијата во Скопје, ја прашавме Филиз?

    “Мислам дека се добри, не сум била во Скопје затоа не можам со сигурност тоа да го потврдам. Вие подобро ги знаете реакциите, но, како што имам слушнато, бројот на нашите гледачи постојано расте“, вели во насмевка Филиз, задоволна од личниот и успехот на серијата.

    За краток период од мирен, спокоен живот во Скопје, Филиз преминува во еден величествен свет (живот во еден Харем) во серијата и секојдневен живот во една динамична метропола како што е Истанбул.

    “Тоа многу не влијаеше на мене, во мојот живот повеќе пати сум имала големи промени, затоа ништо не ме изненадува. Многу сум задоволна од средината во која са наоѓам и секако од убавата промена. Сепак, во Истанбул најмногу ми недостасуваат семејството и пријателите. Копнееам по родителите“, додава Филиз.

    НАПОРНО, НО ЗАБАВНО

    За темпото и начинот на снимање на најамбициозната серија направена во турската ТВ историја, со врвен декор, костими и визуелни ефекти, Филиз Ахмет вели дека деновите кога имаат снимање е променливо, понекогаш е многу напорно, некогаш во чекање да започне нивната сцена, а има и денови кога е многу забавно. “Тоа е еден голем механизам, работат 150-мина професионалци, сите си ја одработуваат својата задача за да можат гледачите да уживаат во 120-те минути, колку што трае една епизода“, додава Филиз.

    ПОПУЛАРНОСТА Е ЧУДНО ЧУВСТВО

    “Хм, не знам воопшто не сум размислувала за тоа, (насмевка) убаво e, истовремено и голема одговорност“ вели популарната актерка одговарајќи на прашањето какво е чувството да бидете одговорен за харемот во популарната серија “Величествениот Султан“.

    Какви се Хурем и Махидевран и Сулејман приватно? “Со сите соработувам прекрасно, нема потреба да се навлегува во детаљи“, вели таа и додава дека актерите знаат дека серијата се емитува и во Македонија, дека и во Скопје се популарни, но за нив тоа е нормално.
    „Величествениот Султан“ од самиот ден на емитувањето со ликовите и со интригите во сарајот продолжува да предизвикува љубопитност. Во овој момент многу е тешко да се каже до кога ќе продолжи серијата. Сеуште има вртоглаво висока гледаност и огромен рејтинг.

    ТЕАТАРОТ ПРВА ЉУБОВ

    На сцена за прв пат се појавува на шест години. Филиз е внука на познатиот актер Љутви Сејфула. Факултетот за драмски уметности во Скопје го заврши пред околу десетина години. Дипломирала во класата на проф. Елјеса Касо. За својот голем талент и успешно одиграни улоги има добиено голем број значајни признанија: Награда за најдобра женска улога на фестивалот „Војдан Чернордински“ во Прилеп, во 2003 и 2007 година, награда на камерниот театар во Струмица „Ристо Шишков“ во 2005 година. “Телевизиските серии и филмовите се многу потребни, и убаво е да си дел од нив, но театарот е мојата прва љубов“, потенцираше Филиз Ахмет.

    “За вас не знам што значи Филиз Ахмет, но за мене уште од серијата “Збогум Румелија“ преставува вистинска актерка која и е потребна на Турција. Долго време во “Величенствениот султан“ ја следам нејзината тивка, но активна улога. Таа е скромна внука на големиот скопски актерски мајстор Љутви Сејфула. Филиз не се појавува многу по магазинските таблоиди, но секогаш е во нашите умови. Филиз Ахмет во наредната деценија ќе биде артистка за која најмногу ќе се зборува. Ова добро запаметете го! “ вели Месут Јар, познатиот турски ТВ критичар.

    Хусамедин Гина

  • ЗАД СЦЕНА МИРЕН, НА СЦЕНА ВИСТИНСКИ „ЅВЕР“

    “Во Македонија има големи мајстори на музиката, особено кога станува збор за дувачките инструменти, како што се трубата, саксофонот” вели Џеџели.

    Не сум заборавил, ниту пак можам да заборавам
    Моја најголема љубов, немој да се грижиш
    Ако тоа е живот, да, јас живеев
    Најголемиот дел од мојата душа остана кај тебе

    Дали жалам, не, никогаш
    Заедно со тагите станав поубав
    Дали сакав, сакав, да
    По тебе, со голема страст…

    Овие стихови беа сосема доволни, Мустафа Џеџели да стане новата ѕвезда на турската поп музика. Со синглот „Не можам да те заборавам„ за многу краток период стигна до врвот на топ листите. Поради карактеристичниот стил на пеење и прекрасниот сентиментален глас, Џеџели, многу брзо стекнува илјадници фанови. Неговата скромност, срамежливост и живот далеку од гламурот и џет сетот се доволни да добие имиџ на народен човек.

    РОМАНТИЧЕН ПРИНЦ

    Во рамките на прославата на Денот на образованието на Турците во Македонија гостуваше токму тој Мустафа Џеџели. Скопската сала Борис Трајковски преполна. Илјадници луѓе, се забавуваа и уживаа најразличните перфоманси на гостинот од Турција. Неговиот сценски настап ги изненади сите присутни кои го познаваат од ТВ екраните, срамежливиот романтичен принц Џеџели, на сцената се претвара во сосема друг човек, станува динамичен, добива магична моќ, на кратко станува вистински „ѕвер„.
    „Моите песни претежно се бавни, затоа, луѓето кои ги слушаат моите песни од ТВ екраните и од интернет имаат впечаток  дека немам динамичен сценски настап. Затоа на моите концерти се пријатно се изненадени„ изјави, Џеџели.
    „Имам информации дека на мојот концерт покрај Турците присуствуваа и љубители на музиката од другите националности, Албанци и Македонци, затоа сум многу среќен„ додаде тој.
    Музичката кариера ја започнува како аранжер, продолжува со снимање на албум, потоа следуваат сценски изведби. Денес веќе е познат како пејач кој што внесе свежа крв во турската поп сцена. Неговиот прв албум, се состои од 13 песни. Видео спот има снимено за девет песни.

    ВО МАКЕДОНИЈА ИМА ГОЛЕМИ МАЈСТОРИ НА МУЗИКАТА

    Родителите на мајката на Џеџели, потекнуваат од Букурешт, Романија. „Затоа имам предиспозиции за Балканската музика“ изјави Џеџели. Според него, во Македонија има големи мајстори на музиката особено кога станува збор за дувачките инструменти, како што се трубата, саксофонот.
    „Моментално го подготвуваме вториот албум. Пред да дојдам во Скопје, планирав да ја снимам музиката за неколку песни од мојот нов албум. Но не успеавме да се подготвиме. Иксрено можам да ви кажам дека ја следам традиционалната балканска музика и фолклорот„ рече Џеџели.
    За време на дводневната посета на Скопје, Џеџели успеал да го прошета градот.
    „Имате многу убав и симпатичен град. Многу вкусна храна. Балканските народи се многу гостопримливи. За тоа многу сум среќен што сум тука со вас„ изјави на крајот новиот принц на турската поп музика. Организатор на концертот беше Турскиот културен центар Јунус Емре од Скопје.

    Хусамедин Гина

  • ШТО АКО НИЕ ДОБИЕМЕ!

    Специјалната голема награда за новогодишната лотарија во Турција оваа година изнесува фантастични 40 милиони лири. Дали овие 40 милиони турски лири, или 21 милиони американски долари или 16 милиони евра, кои се сон на милиони граѓани и дополнителна надеж на новогодишните очекувања, ќе го пронајдат сопственикот на среќното ливче, засега е рано да се каже. Но она што се знае, е дека лозовите се речиси распродадени, само малку останаа до извлекувањето на 31 декември. Надлежните велат дека ако од овие 40 милиони лири, ако од нив се направи спој од најмалите банкноти од по пет лири, тогаш ќе се добие лента долга од Истанбул до Атина. Ако пак се направи купче од банкноти од 200 лири, тогаш ќе тежи 226 килограми.

    Секако дека ако сакаш да бидеш добитник на оваа награда од 40 милиони лири, треба да купиш цел лоз. Наградата се намалува зависно од тоа дали сте купиле половина или четвртина ливче. И секако, шансата е ваша, не се знае дали ќе има еден или повеќе добитници!

    Во Турција, лозовите на Националната Лотарија со наслов „Што ако ние добиеме“ со години се редовен посетител на џебовите на граѓаните, особено оние за новогодишното извлекување.

    Со големо исчекување и секако со ограничена надеж, многумина од нас трчаат да седнат пред телевизорите да го гледаат во живо извлекувањето на последниот ден од старата година. Кога сме зафатени со славење на Новата Година до рано наутро и не сме можеле да го гледаме извлекувањето, првото нешто што го правиме кога ќе се разбудиме е проверката на броевите на ливчињата кои ги бараме низ џебовите, чантите или на некое друго безбедно место, а резултатите ги гледаме на интернет или од весниците…

    И оваа година познатото сценарио нема да се смени. Како што надежите и сништата остануваат во нас се додека сме живи, сонот „Што ако и ние добиеме“ не не напушта… Дури и за оние кои добиваат утешна награда која е еднаква на парите што ги дале за купување на ливчето.

    Продавачите на ливчињата на многу места во Истанбул упорно ги нудат и на оние кои немаат намера да купат со зборовите: „избери едно, сега е твој ред да добиеш“. Пред некои, пак, има долги редици, ги има и пред продажните места за кои се верува дека носат среќа..

    Ако ме прашуваш… Неодамна гледајќи го мојот хороскоп во еден магазин, во кој многумина од нас не веруваат ама не можат да престанат да го читаат, видов дека за мојот знак пишува: „Ова е вашиот среќен ден што се однесува до парите“. Каква коинциденција! Истиот ден во мал рибен ресторан на брегот на Мраморното море во Силиври, каде што бевме со група пријатели, некој, среде ладниот зимски ден, тропна на вратата… Влезе продавачот на лозови. Тој ги држеше ливчињата во рака, а јас му довикнав: „Едно половина ливче ве молам“.. И така, сега тоа половина ливче од девет турски лири е во мојот џеб. Со надеж го чека 31 декември… „Што ако јас добијам?“ За тоа ќе зборуваме подоцна, секако ако ме најдете некаде овде… Со среќа на тебе, со среќа на сите нас!

    Мине Есен Ергур

  • Турќан Шорај – ќе останам во Скопје само ако се заљубам

    Турќан Шорај, кралицата на турскиот филм

    Кариера која би ја посакала секоја млада актерка. Со снимени 205 филма до денес, таа е светска рекордерка. Избрана е и за aмбасадор на добра волја на УНЕСКО, за Турција.

    Со елегантен, класичен црн фустан за свечени пригоди, кралицата на турската кинематографија се појави пред новинарите, среќна, возбудена, насмеана поради фактот дека за прв пат доаѓа во Румелија, родната земја на својата мајка.

    „Многу сум среќна што сум во Скопје. Понудата да бидам на свеченото отворање ја прифатив без расмислување. Мајка ми е од румелиско потекло. Детството ми помина слушајќи ги румелиските песни. Познато ми е дека во Македонија турските филмови се доста популарни“ изјави, Турќан Шорај „Султанот“ на турскиот филм.

    ФЕСТИВАЛ НА МАКЕДОНСКИОТ ФИЛМ ВО ИСТАНБУЛ

    Шорај е родена 945 година во Истанбул. Во едно просечно турско семејство, татко работник, мајка домаќинка. Нејзиното прво присуство на филмското платно се случува на 15 годишна возраст. До денес, со снимени 205 филма е светска рекордерка, а исто така пишува сценарија и режира. На 12 Март, 2010 година избрана е за амбасадор на добра волја на УНЕСКО, за Турција.

    За нејзе од особена важност е главната улога во филмот „Госпоѓа Дила“ адаптирана според книгата „Македонија 1900“ на познатиот турски писател Неџати Џумали. Дејството на филмот се случува во балканските простори.

    На средбата со новинарите призна дека нема големи познавање за македонскиот филм. Но посака и во Истанбул да се оддржи фестивал на македонскиот филм. Побара да се сретнат надлежните од филмската уметност во Македонија. Таа вети дека ќе учествува на свеченото отварање.

    На новинарското прашање дали е можно да остане во Скопје, „не знам…можеби само ако се заљубам“, одговори таа, со насмевка. „Имам многу обврски во Турција. Но сепак, како прво да го прошетам Скопје. Ако ми се допадне ќе видиме“ додаде таа.

    Хусаметин Гина